ऋणको नतिर्न दुई युवाको हत्या, चप्पलले खोल्यो रहस्य

काठमान्डु । ललितपुरमा दुई जना युवक हराएको निवेदन परेपछि सुरु भएको अनुसन्धानले अन्ततः दोहोरो हत्याको रहस्य खोलेको छ । २०८२ मंसिर २८ गते जिल्ला प्रहरी परिसर ललितपुरमा भोजपुरका २१ वर्षीय पारुहाङ राई र सिन्धुलीका २५ वर्षीय केशवराज हायु बेपत्ता भएको भन्दै छुट्टाछुट्टै निवेदन दर्ता भएका थिए ।

प्रहरीले खोजतलाससँगै सम्भावित आपराधिक घटनाको आशंकामा अनुसन्धान अघि बढायो । कल डिटेल र प्राविधिक विश्लेषणका क्रममा केही शंकास्पद नम्बरहरू निगरानीमा राखियो । यसैबीच पुस २ गते ललितपुरको महालक्ष्मी नगरपालिका–८, लुभुस्थित तरकारी बारीको इनारमा एक शव फेला पर्‍यो । पछि उक्त शव केशवराज हायुको भएको पुष्टि भयो ।

हायु हराएको विषयमा बुझ्न प्रहरी सम्पर्कमा आएका सिन्धुलीका देवराज ढुंगेलमाथि शंका गहिरियो । उनी हायुका जेठान दाइ भएको दाबी गर्थे र दुवै मिलेर कृषि फार्म सञ्चालन गर्दै आएका थिए । घटनास्थल नजिकै फेला परेको एक जोर चप्पल र त्यससँग मिल्दोजुल्दो भिडियो प्रमाणले अनुसन्धान देवराजतर्फ मोडियो ।

प्रहरीले देवराजको कोठामा खानतलासी गर्दा हत्यामा प्रयोग भएका सामग्री बरामद गर्‍यो । त्यसपछि उनले हत्या स्वीकार गर्दै सिन्धुलीकै जयराम अधिकारीको संलग्नता पनि खुलाए । जयराम पक्राउ परेपछि उनले पनि केशवराज हायुको हत्या मात्र होइन, पारुहाङ राईको हत्या पनि दुवै मिलेर गरेको बयान दिए ।

जयरामको बयानका आधारमा भक्तपुरको देउराली भञ्ज्याङको झाडीबाट पारुहाङको शव फेला पर्‍यो । अनुसन्धान अनुसार, आर्थिक लेनदेन र ऋण तिर्न नसक्ने अवस्थाले दुईवटै हत्या भएको खुलेको छ । पारुहाङले वैदेशिक रोजगारीका लागि बुझाएको रकम देवराजले आफ्नै ऋण तिर्न प्रयोग गरेका थिए भने केशवराजसँग पनि ठूलो रकमको विवाद थियो ।

प्रहरीका अनुसार दुवै युवकलाई छुट्टाछुट्टै मितिमा एउटै हतौडाले हत्या गरिएको हो । देवराज र जयराम हाल ललितपुर प्रहरीको हिरासतमा छन् । जिल्ला अदालतले अनुसन्धानका लागि पहिलो चरणमा सात दिनको म्याद दिएको प्रहरीले जनाएको छ ।