पश्चिमी न्यून चापीय प्रणाली सक्रियः पहाडमा वर्षा, तराईमा गर्मी बढ्ने सम्भावना

काठमाडौं । मुलुकको पश्चिमी भू–भाग नजिक सक्रिय रहेको उपल्लो वायुमण्डलीय न्यून चापीय प्रणाली र स्थानीय वायुको संयुक्त प्रभावका कारण देशका हिमाली तथा पहाडी क्षेत्रमा वर्षा हुने तथा तराईका केही भू–भागमा तापक्रम बढ्ने सम्भावना देखिएको छ ।

जल तथा मौसम पूर्वानुमान महाशाखाका अनुसार हाल गण्डकी र कर्णाली प्रदेशका हिमाली तथा पहाडी क्षेत्रमा सामान्यदेखि पूर्ण बदली रहेको छ । अन्य पहाडी क्षेत्रमा आंशिक बदली रहेको भने अधिकांश तराई क्षेत्रमा मौसम मुख्यतः सफा छ । कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका केही स्थानमा हल्का वर्षा भइरहेको छ ।

महाशाखाले आज दिउँसो हिमाली तथा पहाडी क्षेत्रमा सामान्य बदली रहने र तराई क्षेत्रमा आंशिक बदली रहने जनाएको छ । हिमाली तथा पहाडी भू–भागका केही स्थान तथा कोशी र मधेश प्रदेशका तराईका एक–दुई स्थानमा मेघगर्जन र चट्याङसहित मध्यम वर्षाको सम्भावना रहेको छ । उच्च हिमाली क्षेत्रमा हल्का हिमपात पनि हुन सक्ने अनुमान गरिएको छ ।

यस्तै, मधेश, कोशी, बागमती र गण्डकी प्रदेशका तराई क्षेत्रमा तापक्रम क्रमशः बढ्ने सम्भावना रहेकाले गर्मीको प्रभाव बढ्न सक्ने मौसमविद्हरूले बताएका छन् ।

आज राति पनि हिमाली क्षेत्रमा सामान्य बदली कायम रहनेछ भने पहाडी क्षेत्र तथा कोशी र मधेश प्रदेशको तराईमा आंशिक बदली रहने सम्भावना छ । कोशी, मधेश र बागमती प्रदेशका हिमाली तथा पहाडी क्षेत्रका केही स्थान तथा गण्डकी र कर्णाली प्रदेशका हिमाली भू–भागमा हल्का वर्षा वा हिमपात हुन सक्ने महाशाखाको प्रक्षेपण छ ।

यसैबीच, देशका विभिन्न हिमाली तथा पहाडी क्षेत्रमा मेघगर्जन र चट्याङसहित वर्षाको सम्भावना रहेकाले सतर्क रहन तथा मौसमसम्बन्धी पछिल्ला सूचनाहरू नियमित रूपमा हेर्न महाशाखाले सर्वसाधारणलाई आग्रह गरेको छ ।