चक्रवात ‘अर्नब’को प्रभाव आज बढी, पाँच प्रदेशमा भारी वर्षाको सम्भावना

काठमाडौं । बंगालको खाडीमा विकसित चक्रवात ‘अर्नब’को प्रभावले आज (शुक्रबार) नेपालका अधिकांश क्षेत्रमा वर्षा हुने सम्भावना रहेको मौसमविद्ले बताएका छन् । चक्रवात कमजोर भइसके पनि त्यसबाट विकसित न्यूनचापीय प्रणालीको प्रभाव कायम रहेकाले देशका विभिन्न स्थानमा मध्यमदेखि भारी वर्षा, हिमपात तथा हावाहुरी हुन सक्ने पूर्वानुमान गरिएको छ ।

बिहीबार कोशी प्रदेशका केही स्थानमा हल्का वर्षा भएको थियो भने काठमाडौं उपत्यकामा पनि छिटफुट पानी परेको थियो । आज भने वर्षाको मात्रा बढ्नुका साथै प्रभाव क्षेत्रसमेत विस्तार हुने सम्भावना रहेको मौसमविद्हरूले बताएका छन् ।

नेपाल मौसम विज्ञान विभागका अनुसार आज दिउँसोदेखि रातिसम्म कोशी, मधेश, बागमती, गण्डकी र लुम्बिनी प्रदेशका अधिकांश स्थानमा मेघगर्जन र चट्याङसहित वर्षा हुन सक्नेछ । विशेषगरी कोशी र बागमती प्रदेशका धेरै स्थानमा भारी वर्षाको सम्भावना रहेको छ । उच्च हिमाली तथा पहाडी क्षेत्रमा हिमपात हुन सक्ने विभागले जनाएको छ ।

त्रिभुवन विश्वविद्यालयको जल तथा मौसम केन्द्रीय विभागका अनुसार चक्रवातको प्रभावले शुक्रबार अपराह्नदेखि रातिसम्म वर्षा अझ तीव्र हुन सक्छ । शनिबारदेखि भने यसको प्रभाव क्रमशः कमजोर हुँदै जाने अनुमान गरिएको छ ।

पाँच प्रदेशमा वर्षा, हिमाली क्षेत्रमा हिमपातको जोखिम
मौसम विज्ञान विभागका वरिष्ठ मौसमविद्का अनुसार कात्तिक १४ गतेसम्म कोशी, मधेश, बागमती, गण्डकी र लुम्बिनी प्रदेशका अधिकांश स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ । कर्णाली र सुदूरपश्चिम प्रदेशका हिमाली तथा पहाडी भूभागका केही स्थानमा भारी वर्षा र हिमपात हुन सक्ने पूर्वानुमान गरिएको छ ।

वर्षा र हिमपातका कारण तापक्रम घट्दा चिसोसमेत बढ्न सक्नेछ । पहिरोको जोखिम रहेका क्षेत्र तथा सडक आसपासका बस्तीमा सतर्कता अपनाउन मौसमविद्ले आग्रह गरेका छन् । वर्षाका कारण सडक तथा हवाई यातायात प्रभावित हुन सक्ने भएकाले यात्रामा निस्कनुअघि मौसमको अवस्था बुझ्न पनि सुझाव दिइएको छ ।

विपद् जोखिमलाई ध्यानमा राख्दै सरकार सतर्क
चक्रवात ‘अर्नब’को प्रभाव हिमालदेखि तराईसम्म पर्न सक्ने आँकलन गर्दै सरकारले सुरक्षा निकाय तथा सम्बन्धित सरकारी संयन्त्रलाई उच्च सतर्कतामा रहन निर्देशन दिएको छ । विशेषगरी उच्च हिमाली क्षेत्रमा बाक्लो हिमपात, हिमआँधी र हिमपहिरोको जोखिम रहेकाले आवश्यक पूर्वतयारीमा जोड दिइएको छ ।

विपद् प्रतिकार्य कमाण्ड पोष्टको बिहीबार बसेको बैठकले जोखिमयुक्त जिल्लाको अवस्थाबारे निरन्तर जानकारी लिन, सर्वसाधारणलाई समयमै सूचना प्रवाह गर्न तथा आवश्यक परे तत्काल उद्धार र प्रतिकार्यमा खटिन सक्ने गरी तयारी अवस्थामा रहन सम्बन्धित निकायलाई निर्देशन दिएको थियो ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि सूचना जारी गर्दै हावाहुरी, चट्याङ, हिमआँधी र भारी वर्षाको सम्भावनालाई ध्यानमा राखेर सावधानी अपनाउन आग्रह गरेको छ ।

प्राधिकरणले देशका हिमाली तथा उच्च पहाडी क्षेत्रमा तत्कालका लागि पर्वतारोहण र पदयात्रा नगर्न सुझाव दिएको छ । पदयात्रामा गइसकेका व्यक्तिलाई सुरक्षित स्थानमा बस्न र मौसम अनुकूल नभएसम्म जोखिमपूर्ण यात्रा नगर्न भनिएको छ । किसानलाई पनि कात्तिक १४ गतेसम्म धान नकाट्न सुझाव दिइएको छ ।

भारतको तटीय क्षेत्रबाट प्रवेश गरेको थियो चक्रवात
मौसम विज्ञान विभागका अनुसार चक्रवात ‘अर्नब’ बुधबार बिहान करिब ८ः१५ बजे भारतको आन्ध्र प्रदेश र यानमको तटीय क्षेत्र हुँदै जमिनमा प्रवेश गरेको थियो । त्यसपछि यो उत्तर–उत्तरपश्चिम दिशातर्फ अघि बढ्दै क्रमशः कमजोर बनेर गहिरो न्यूनचापीय प्रणालीमा परिणत भएको हो ।

उक्त प्रणालीको प्रभावका कारण बिहीबारदेखि नै नेपालका अधिकांश क्षेत्रमा बादल लाग्न थालेको थियो । यसको प्रभावले देशका विभिन्न भूभागमा वर्षा, हिमपात तथा हावाहुरीको सम्भावना कायम रहेको विभागले जनाएको छ ।