चक्रवात अर्नबको प्रभाव कायमै, देशका अधिकांश स्थानमा वर्षाको सम्भावना

काठमाडौं । बङ्गालको खाडीमा विकसित चक्रवात ‘अरनब’को अवशेष र पश्चिमी वायुको आंशिक प्रभावले देशभरको मौसम प्रभावित भएको छ । मौसम पूर्वानुमान महाशाखाका अनुसार देशका अधिकांश भूभागमा बादल लागेको छ भने विभिन्न प्रदेशमा वर्षा भइरहेको छ ।

महाशाखाका अनुसार हाल कोशी, मधेश, बागमती, गण्डकी र लुम्बिनी प्रदेशका धेरै स्थानमा मध्यमसम्मको वर्षा भइरहेको छ । कर्णाली र सुदूरपश्चिम प्रदेशका केही स्थानमा भने हल्का वर्षा भइरहेको छ ।

आज दिउँसो पनि देशका अधिकांश भूभागमा बदली रहने अनुमान गरिएको छ । कोशी, मधेश, बागमती, गण्डकी, लुम्बिनी र कर्णाली प्रदेशमा अधिकांश बदली रहनेछ भने सुदूरपश्चिम प्रदेशमा साधारणतया बादल लाग्ने महाशाखाले जनाएको छ ।

दिउँसो कोशी, मधेश र बागमती प्रदेशका धेरै स्थानमा तथा गण्डकी प्रदेशका केही स्थानमा मेघगर्जन र चट्याङसहित मध्यमसम्मको वर्षा हुने सम्भावना छ । त्यसैगरी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागका केही स्थानमा वर्षा र हिमपात हुन सक्ने पूर्वानुमान गरिएको छ ।

महाशाखाका अनुसार कोशी, मधेश र बागमती प्रदेशका एक(दुई स्थानमा भारी वर्षा तथा हिमपातको समेत सम्भावना रहेको छ । यस्तै, लुम्बिनी र सुदूरपश्चिम प्रदेशका तराई भूभागका थोरै स्थानमा हल्का वर्षा हुन सक्ने अनुमान छ ।

आज राति पनि देशभर साधारणतया बादल लाग्नेछ । हिमाली भूभागका थोरै स्थानमा मध्यमसम्मको वर्षा र हिमपात हुन सक्नेछ भने कोशी र गण्डकी प्रदेशका पहाडी भूभागका एक(दुई स्थानमा हल्का वर्षाको सम्भावना रहेको मौसम पूर्वानुमान महाशाखाले जनाएको छ ।

मौसममा आएको परिवर्तनका कारण वर्षा, चट्याङ र हिमपातको सम्भावना रहेका क्षेत्रमा सतर्कता अपनाउन आवश्यक देखिएको छ ।