ओली पक्राउविरुद्ध एमालेको चरणबद्ध देशव्यापी आन्दोलन घोषणा

काठमाडौं । नेपाल कम्युनिष्ट पार्टी (एमाले) ले पार्टी अध्यक्ष केपी शर्मा ओलीको पक्राउको विरोधमा देशव्यापी चरणबद्ध आन्दोलन घोषणा गरेको छ । मंगलबार बसेको केन्द्रीय सचिवालय बैठकले वडा तहदेखि राजधानी केन्द्रित प्रदर्शनसम्मका कार्यक्रम तय गरेको हो ।

महासचिव शंकर पोखरेलका अनुसार आन्दोलनलाई क्रमशः जिल्ला, पालिका, प्रदेश र केन्द्रसम्म विस्तार गरिनेछ । पहिलो चरणमा चैत २५ गतेसम्म जिल्ला तहमा आन्दोलन केन्द्रित बृहत् भेला आयोजना गरिनेछ । त्यसपछि चैत २८ गते सबै पालिकामा विरोध प्रदर्शन हुनेछ ।

त्यसैगरी वैशाख ३ गते वडा तहमा भेला, वैशाख ७ गते प्रदेश राजधानीहरूमा प्रदर्शन, र वैशाख १२ गते काठमाडौंमा विशाल विरोध सभा तथा प्रदर्शन गर्ने निर्णय एमालेले गरेको छ । चैत २४ गते सबै जिल्ला कमिटीले वृहत् कार्यकर्ता भेला आयोजना गर्ने कार्यक्रम पनि तय गरिएको छ ।

सचिवालय बैठकले पूर्वप्रधानमन्त्री ओली तथा पूर्व गृहमन्त्री रमेश लेखकको गिरफ्तारीलाई “प्रतिशोधपूर्ण र बदला–प्रेरित” भन्दै सरकारको कडा आलोचना गरेको छ । साथै, शान्तिपूर्ण आन्दोलनमाथि प्रहरीमार्फत भएको दमनको घोर भर्त्सना गरिएको जनाएको छ ।

आन्दोलनलाई थप प्रभावकारी बनाउन विद्यार्थी, पेशागत तथा अन्य जनसंगठनहरूलाई पनि आफ्नै ढंगले कार्यक्रम सञ्चालन गर्न निर्देशन दिइएको छ । यसका लागि भोलि बिहान ११ बजे पार्टी कार्यालयमा जनसंगठन संयन्त्रको बैठक बस्नेछ ।

एमालेले सर्वपक्षीय नागरिक संवादका लागि उपाध्यक्ष रघुजी पन्त, उपमहासचिव योगेश भट्टराई र केन्द्रीय सदस्य मीनबहादुर शाहीलाई जिम्मेवारी दिएको छ । संसदभित्र अन्य दलहरूसँग सहकार्य तथा प्रभावकारी प्रस्तुतीका लागि उपाध्यक्ष रामबहादुर थापा ‘बादल’ र सचिव पद्मा अर्याललाई जिम्मेवारी तोकिएको छ ।

यस्तै, आन्दोलनका थप कार्यक्रम तय गर्न छिट्टै केन्द्रीय कमिटी बैठक बोलाउने निर्णय पनि सचिवालयले गरेको छ ।