सरकारले खर्च कटौतीका लागि कर्मचारी संख्या घटाउने

काठमाडौं । नयाँ सरकारले खर्च कटौतीलाई प्राथमिकतामा राख्दै संघीय निजामती सेवामा कार्यरत कर्मचारी संख्या घटाउने निर्णय गरेको छ । सिंहदरबारमा मंगलबार बसेको सचिवहरूको बैठकले यो निर्णय लिएको हो ।

मुख्यसचिवसहित सबै सचिवहरूको उपस्थितिमा सम्पन्न उक्त बैठकले हाल संघीय सरकार मातहत रहेको कुल दरबन्दीको २० प्रतिशत कटौती गर्ने निष्कर्ष निकालेको छ । यसका लागि संगठन तथा व्यवस्थापन सर्वेक्षणमार्फत प्रक्रिया अघि बढाइनेछ ।

बैठकले अनलाइन सेवाको विस्तार गर्ने, अनावश्यक खर्च कटौती गर्दै मितव्ययी बन्ने रणनीति अपनाउने निर्णय गरेको छ । अत्यावश्यक बाहेकका कर्मचारी हटाउने नीति पनि बैठकमा पारित भएको छ ।

कर्मचारी कटौतीको प्रक्रिया मन्त्रालय, आयोग, सचिवालय तथा अन्य कार्यालयहरूबाट सुरु गरिनेछ । सचिवहरूको भनाइ अनुसार यो निर्णय असोज महिनाभित्रै मन्त्रिपरिषद्मा स्वीकृतिका लागि पेश गरिनेछ ।

बैठकले अनावश्यक देखिएका सरकारी निकायहरूलाई खारेज, गाभ्ने वा स्थानान्तरण गर्ने प्रक्रिया पनि छिट्टै सुरु गर्ने बताएको छ । यसले प्रशासनिक संरचना सरल बनाउने विश्वास लिइएको छ ।

सचिवहरूको अनुसार यो निर्णय कार्यान्वयन भएपछि करिब १०,००० भन्दा बढी दरबन्दी कटौती हुनेछ । यसले राज्यको खर्चमा उल्लेखनीय कटौती हुने अपेक्षा गरिएको छ ।

सरकार मातहतका सबै कार्यालयहरूलाई तालिम तथा गोष्ठीहरू सरकारी भवन र हलमै गर्नुपर्ने निर्णय गरिएको छ । त्यस्तै, कुनै पनि बैठकमा सहभागी कर्मचारीहरूले भत्ता नलिने निर्णय समेत सचिवहरूको बैठकले गरेको छ ।