बुधबार देशका यी नदीहरूमा आकस्मिक बाढीको जोखिम, सतर्क रहन आग्रह

काठमाडौं । हाल नेपालको अधिकांश भागमा मनसुनी प्रणाली सक्रिय रहेको जल तथा मौसम पूर्वानुमान महाशाखाले जनाएको छ । मनसुनको न्यून चापीय रेखा सरदर स्थानमै रहेकोले देशभर सामान्य बदली छ भने केही स्थानमा हल्का वर्षा भइरहेको छ ।

कोशी, बागमती, गण्डकी, कर्णाली र सुदूरपश्चिम प्रदेशका केही स्थानहरूमा लगातार झिनो वर्षा भइरहे पनि प्रमुख नदीहरूको बहाव हाल सतर्कता तहभन्दा मुनि रहेको बाढी पूर्वानुमान महाशाखाले जनाएको छ । बिहानको मापन अनुसार कोशी, नारायणी, कर्णाली, महाकाली, कमला, बागमती, पूर्वी राप्ती, पश्चिम राप्ती, बबई र कन्काई नदीहरूमा बाढीको तत्काल उच्च जोखिम छैन ।

तर बुधबारका लागि केही पहाडी तथा हिमाली जिल्लामा आकस्मिक बाढीको सम्भावना मध्यमदेखि उच्च रहेको महाशाखाले सचेत गराएको छ । विशेष गरी सङ्खुवासभा, सोलुखुम्बु, रामेछाप, दोलखा, सिन्धुपाल्चोक, रसुवा, धादिङ, नुवाकोट, रुकुम पश्चिम, बझाङ, बाजुरा, अछाम, डोटी, डोल्पा, मुगु र हुम्ला लगायत क्षेत्र हुँदै बहने साना नदी तथा खोलामा पानीको बहाव अचानक बढ्ने सम्भावना रहेको छ ।

यसका साथै ताप्लेजुङ, पाँचथर, ओखलढुङ्गा, काठमाडौं उपत्यकाका तीन जिल्ला (काठमाडौं, ललितपुर, भक्तपुर), काभ्रेपलाञ्चोक, चितवन, गोरखा, लमजुङ, कास्की, बागलुङ, म्याग्दी, पर्वत, रुकुम पूर्व, जाजरकोट, दैलेख र सुर्खेत जिल्लाका खोलानालामा पनि बहाव बढ्ने सम्भावना मध्यमस्तरको रहेको अनुमान गरिएको छ ।

बाढी पूर्वानुमान महाशाखाले ती क्षेत्रका बासिन्दालाई सतर्कता अपनाउन, नदी किनारामा अनावश्यक गतिविधि नगर्न र सूचना प्रणालीमार्फत अपडेट रहन अनुरोध गरेको छ ।