महाधिवेशन कार्यतालिकामा सहमति नजुट्दा कांग्रेस केन्द्रीय समिति बैठक स्थगित

काठमाडौं । नेपाली कांग्रेसको केन्द्रीय समिति बैठक पुनः स्थगित भएको छ । कार्यवाहक सभापति पूर्णबहादुर खड्का र महामन्त्रीद्वय गगन थापा तथा विश्वप्रकाश शर्माबीच महाधिवेशन कार्यतालिका तय गर्ने विषयमा सहमति नजुटेपछि बैठक रोकिएको हो ।

एक केन्द्रीय नेताका अनुसार, “कार्यतालिकामा कुरा नमिलेकाले आइतबार दिउँसो १ बजे बस्ने गरी बैठक स्थगन गरिएको छ ।”

कांग्रेसभित्र आगामी महाधिवेशन कहिले गर्ने भन्ने विषयमा मतभेद तीव्र बनेको छ । संस्थापन पक्ष प्रतिनिधि सभा चुनाव सम्पन्न भएपछि मात्र १५औँ महाधिवेशन गर्ने पक्षमा छ भने महामन्त्री समूह (गगन–विश्व) मंसिरमै नियमित महाधिवेशन गर्नुपर्ने अडानमा छन् । यही फरक धारका कारण पार्टीभित्र समन्वय टुटिरहेको नेताहरूले बताएका छन् ।

बैठक स्थगन हुनुअघि बिहान महामन्त्रीद्वयले नेता शेखर कोइरालासँग छलफल गरेका थिए । सो क्रममा १६ पुसमा केन्द्रीय महाधिवेशन गर्ने प्रस्ताव तयार गरी त्यसमा दबाव दिने योजना बनाइएको थियो ।

तर, त्यसपछि कार्यवाहक सभापति खड्कासँग भएको छलफलमा सहमति हुन नसक्दा केन्द्रीय समिति बैठक पुनः स्थगित गरिएको हो ।

पार्टीभित्र महाधिवेशन मिति र कार्यतालिका सम्बन्धी विवाद समाधान नहुँदासम्म कांग्रेसको संगठनात्मक गतिविधि अन्योलमा पर्ने देखिएको छ ।