प्रधानमन्त्री ओलीको आज विशेष सम्बोधन, संसदमा कार्यसूची व्यस्त

काठमाडौं । प्रधानमन्त्री केपी शर्मा ओलीले आज प्रतिनिधिसभामा विशेष सम्बोधन गर्ने भएका छन् । नियमित प्रश्नोत्तर सत्रको प्रारम्भ हुनुअघि प्रधानमन्त्रीले संसद्‍लाई सम्वोधन गर्ने कार्यक्रम रहेको छ ।

नेकपा एमालेका प्रमुख सचेतक महेश बर्तौलाले जानकारी दिँदै भने, ‘प्रधानमन्त्रीज्यूको आजको नियमित प्रश्नोत्तरमा सहभागिता रहनेछ । तर त्यसअघि उहाँले सरकारको कामकारवाही, वर्तमान राजनीतिक परिदृश्य र प्रतिपक्षी नेताहरूको अभिव्यक्तिबारे आफ्नो धारणा राख्दै विशेष सम्बोधन गर्नुहुनेछ ।’

प्रतिनिधिसभाको बैठक आज दिउँसो १ बजे नयाँ बानेश्वरस्थित संघीय संसद् भवनमा सुरु हुनेछ । बैठकमा विशेष सम्बोधनपछि प्रधानमन्त्री ओली सांसदहरूको जिज्ञासामा जवाफ दिने कार्यक्रम रहेको छ ।

आजको बैठकमा सभामुख देवराज घिमिरेले राष्ट्रियसभाबाट पारित ‘पानीजहाज (सञ्चालन तथा व्यवस्थापन) विधेयक, २०८१’ माथि विचार गरियोस् भन्ने प्रस्ताव निर्णयका लागि प्रस्तुत गर्ने कार्यसूची छ ।

त्यस्तै, उद्योग वाणिज्य तथा आपूर्ति मन्त्री दामोदर भण्डारीले ‘विश्व व्यापार संगठनसँगको मत्स्य उद्योगमा सहुलियतसम्बन्धी सम्झौता’ विषयमा सामान्य छलफलको प्रस्ताव संसद्‍मा प्रस्तुत गर्ने सम्भावित कार्यक्रम रहेको संसद् सचिवालयले जनाएको छ ।