कांग्रेसको पालिका अधिवेशन आज, पाँच पदाधिकारी चयन हुने

काठमाडौं । नेपाली कांग्रेसले १५औँ महाधिवेशनको तयारीअन्तर्गत आज देशभर पालिका तहको अधिवेशन गर्दैछ । स्थानीय तहमा पार्टीको सांगठनिक संरचना निर्माण तथा नयाँ नेतृत्व चयन गर्ने उद्देश्यले पालिका अधिवेशन आयोजना गरिएको हो ।

कांग्रेस केन्द्रीय निर्वाचन समितिका अनुसार अधिकांश वडामा अधिवेशन सम्पन्न भइसकेको छ । केही स्थानमा बाहेक देशभर वडा अधिवेशन उत्साहजनक र शान्तिपूर्ण रूपमा सम्पन्न भएको समितिले जनाएको छ ।

बाढीपहिरो प्रभावित नुवाकोट र धादिङका सबै वडामा पनि मंगलबार अधिवेशन सम्पन्न भएको छ । मधेस प्रदेशका सिरहा, सप्तरी, सर्लाही र पर्साका केही वडामा समेत अधिवेशन सफलतापूर्वक सम्पन्न भएको निर्वाचन समितिले जनाएको छ ।

रसुवामा भने बाढीपहिरोबाट भएको ठूलो मानवीय तथा भौतिक क्षतिलाई ध्यानमा राख्दै पालिका तथा वडा अधिवेशनको प्रक्रिया केही दिनपछि अघि बढाइने भएको छ । निर्वाचन समितिका सदस्य सचिव राजु कटुवालका अनुसार जिल्लाको विशेष परिस्थितिका कारण यस्तो व्यवस्था गरिएको हो ।

नयाँ विधान र निर्वाचन निर्देशिकाअनुसार आज हुने पालिका अधिवेशनबाट प्रत्येक पालिकामा पाँच जना पदाधिकारी निर्वाचित हुनेछन् । जसमा एक सभापति, एक महिलासहित दुई उपसभापति, एक सचिव र एक सहसचिव रहने व्यवस्था छ ।

पालिकाको कोषाध्यक्ष भने निर्वाचित कार्यसमिति सदस्यहरूमध्येबाट सभापतिले मनोनयन गर्ने प्रावधान रहेको कांग्रेस केन्द्रीय निर्वाचन समितिले जनाएको छ ।