सुनसरीको देवानगन्ज झडप नियन्त्रणका क्रममा प्रहरीको गोली लाग्दा एक जनाको मृत्यु

काठमाडौं । सुनसरीको देवानगन्ज गाउँपालिका–३ कप्तानगन्जमा दुई समूहबीच भएको हिंसात्मक झडप नियन्त्रणका क्रममा सशस्त्र प्रहरीले चलाएको गोली लागेर एक युवकको मृत्यु भएको छ । घटनामा अन्य १० जना घाइते भएका छन् भने केहीको अवस्था गम्भीर रहेको प्रहरीले जनाएको छ ।

मृत्यु हुनेमा स्थानीय २४ वर्षीय ओमप्रकाश मेहता रहेका छन् । जिल्ला प्रहरी कार्यालय सुनसरीका डीएसपी चन्द्रबहादुर खड्काका अनुसार गोली लागेर गम्भीर घाइते भएका मेहतालाई उपचारका लागि विराटनगरस्थित न्युरो अस्पताल लगिएको थियो । उपचारका क्रममा आइतबार राति ११ः२५ बजे चिकित्सकले उनलाई मृत घोषणा गरेका हुन् ।

प्रहरीका अनुसार दुई समूहबीच सुरु भएको सामान्य विवाद विस्तारै उग्र बन्दै झडप, तोडफोड र आगजनीसम्म पुगेपछि स्थिति नियन्त्रणमा लिन बल प्रयोग गर्नुपरेको थियो । घटनामा घाइते भएका व्यक्तिहरूको विराटनगरस्थित न्युरो अस्पताल, विराट नर्सिङ होम र नोबेल मेडिकल कलेजलगायतका अस्पतालमा उपचार भइरहेको छ । केही घाइतेको परिचय अझै खुल्न बाँकी रहेको जनाइएको छ ।

स्थानीयका अनुसार साउने सोमबारको अवसरमा बोलबम यात्राका लागि युवाहरू डिजे बजाउँदै सप्तकोसी नदीतर्फ जाने तयारीमा थिए । त्यसक्रममा अर्को समूहले रातिको समयमा ठूलो आवाज र होहल्लाप्रति आपत्ति जनाएपछि दुई पक्षबीच भनाभन सुरु भएको थियो । साँझ करिब ९ः०० बजेदेखि सुरु भएको विवाद केही समयमै हिंसात्मक बनेको स्थानीयको भनाइ छ ।

घटनास्थलमा नेपाल प्रहरी र सशस्त्र प्रहरीको संयुक्त टोली पुग्दा घर, मेडिकल पसल तथा सवारी साधनमा तोडफोड र आगजनी भइरहेको प्रहरीले जनाएको छ । अवस्था थप जटिल बनेपछि इनरुवामा जिल्ला सुरक्षा समितिको आकस्मिक बैठक बसेर स्थिति नियन्त्रणका लागि आवश्यक बल प्रयोग गर्ने निर्णय गरिएको थियो ।

घटनाबारे विस्तृत अनुसन्धान भइरहेको प्रहरीले जनाएको छ । सम्भावित थप तनावलाई मध्यनजर गर्दै प्रभावित क्षेत्रमा सुरक्षा व्यवस्था कडा पारिएको छ ।