दिल्लीमा रवि लामिछाने–अमेरिकी विशेष दूत सर्जियो गोर भेट

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछाने र अमेरिकी राष्ट्रपति डोनाल्ड ट्रम्पका दक्षिण तथा मध्य एसियाली विशेष दूत सर्जियो गोरबीच नयाँ दिल्लीमा भेटवार्ता भएको छ ।

बिहीबार साँझ भएको उक्त भेटमा दुई पक्षबीच समसामयिक राजनीतिक तथा क्षेत्रीय विषयमा छलफल भएको जनाइएको छ । पाँचदिने भारत भ्रमणमा रहेका लामिछाने भारतीय जनता पार्टी (भाजपा)को निमन्त्रणामा नयाँ दिल्ली पुगेका हुन् ।

भ्रमणका क्रममा उनले भारतीय प्रधानमन्त्री नरेन्द्र मोदी, गृहमन्त्री अमित शाह, विदेशमन्त्री सुब्रमन्यम जयशंकर तथा अन्य राजनीतिक नेतृत्वसँग समेत भेटघाट गरिसकेका छन् ।

रास्वपाका अनुसार दिनभर प्रवास कमिटीद्वारा आयोजित कार्यक्रममा सहभागी भएका लामिछानेले साँझ गोरसँग भेटवार्ता गरेका हुन् । गोर हाल भारतका लागि अमेरिकी राजदूत तथा दक्षिण र मध्य एसियाका लागि विशेष दूतको जिम्मेवारीमा रहेका छन् ।

यसअघि पनि गोर नेपाल भ्रमणका क्रममा रास्वपा नेतृत्वसँग भेटवार्ता गरेका थिए ।