लगातार पाँचौ जित निकाल्दै सुदुरपश्चिम प्लेअफमा, जोखिममा जनकपुर

काठमान्डु । दोस्रो सिजनको नेपाल प्रिमियर लिग (एनपीएल) टी-२० क्रिकेटमा सुदूरपश्चिम रोयल्सले शनिबार कीर्तिपुरस्थित त्रिवि मैदानमा साविक विजेता जनकपुर बोल्ट्सलाई ६ विकेटले हराउँदै लगातार पाँचौं जित दर्ता गरेको छ । यस जितसँगै सुदूरपश्चिमले लिग चरणका दुई खेल बाँकी रहँदै प्लेअफमा स्थान पक्का गरेको छ ।

जनकपुरले दिएको १४६ रनको लक्ष्य सुदूरपश्चिमले १७.४ ओभरमा ४ विकेटको क्षतिमा पूरा गर्यो । सुरुवातमै जोश ब्राउन गोल्डेन डकमा फर्किए पनि इशान पाण्डे र विनोद भण्डारीको ९१ रनको साझेदारीले टोलीलाई सहज स्थितिमा पुर्‍यायो ।

इशान पाण्डेले ३५ बलमा ८ चौका र १ छक्कासहित ५६ रनको अर्धशतक प्रहार गरे । भण्डारीले ४२ रन जोड्दै टिमलाई बलियो अवस्थामा पुर्‍याए । अन्त्यतिर दीपेन्द्रसिंह ऐरी (१० नटआउट) र हर्मित सिंह (२५ नटआउट) ले सहज जीत दिलाए ।

जनकपुरका माज सदाकले २ विकेट लिए ।

पहिले ब्याटिङ गरेको जनकपुरले ८ विकेटको क्षतिमा १४५ रन बनायो । सुरुवात नै खराब रह्यो—ओपनर आसिफ शेख चौथो बलमै बोल्ड, त्यसपछि मयन यादव ६ रनमा आउट । छिट्टै माज सदाक पनि १२ रनमा आउट हुँदा पावरप्लेमै ३ विकेट गुमाएर जनकपुर दबाबमा पर्‍यो ।

मध्यक्रममा सञ्जय कृष्णमूर्तिले ५० रनको महत्वपूर्ण पारी खेले भने यान निकोल लोफ्टी इटनले ३९ रन जोड्दै टोलीलाई उकास्ने प्रयास गरे । आदित्य महता (१५) र कप्तान वाइन पार्नेल (१४) ले पनि योगदान दिए ।

सुदूरपश्चिमका अविनास बोहराले उत्कृष्ट बलिङ गर्दै ४ ओभरमा ४ विकेट लिए । स्कट कुगेइलिनले ३ विकेट झारे ।

लगातार चार खेलमा पराजित जनकपुर लिग चरणबाटै बाहिरिने जोखिममा छ । प्लेअफ पुग्न अब उसले बाँकी सबै खेल जित्नुका साथै अन्य टिमको नतिजामा पनि भर पर्नु पर्नेछ ।