आर्सनल उपाधिनजिक, बर्नलीलाई हराउँदै प्रिमियर लिगमा पाँच अंकको अग्रता

काठमाडौं । आर्सनलले बर्नलीमाथि १-० को कठिन जित निकाल्दै २२ वर्षपछि प्रिमियर लिगको उपाधि जित्ने सम्भावना बलियो बनाएको छ । सोमबार भएको खेलमा काइ हाभर्ट्जले गरेको एक मात्र गोल निर्णायक बन्यो ।

एमिरेट्स स्टेडियममा भएको खेलको ३७औँ मिनेटमा हाभर्ट्जले बुकायो साकाको कर्नरलाई शक्तिशाली हेडमार्फत जाली चुमाउँदै आर्सनललाई अग्रता दिलाएका थिए । यो सिजन आर्सनलले कर्नरबाट गरेको १८औँ लिग गोल हो ।

जितसँगै मिकेल आर्टेटाको टोलीले शीर्ष स्थानमा पाँच अंकको अग्रता बनाएको छ । अब मंगलबार म्यान्चेस्टर सिटीले बोर्नमाउथविरुद्ध अंक गुमाए आर्सनल च्याम्पियन बन्नेछ । यदि सिटीले बाँकी दुवै खेल जिते पनि आर्सनलले क्रिस्टल प्यालेसविरुद्ध जित निकाले उपाधि सुनिश्चित गर्नेछ ।

तर बर्नलीविरुद्धको संघर्षपूर्ण प्रदर्शनले भने सिटीलाई अझै आशा दिएको छ । आर्सनलले अन्तिम खेलमा बराबरी खेले र सिटीले बाँकी खेल जिते गोलअन्तरका आधारमा उपाधि हात पार्न सक्छ ।

खेलमा हाभर्ट्ज विवादमा पनि परे । दोस्रो हाफमा उनले लेस्ली उगोचुकुको खुट्टामा खतरनाक ट्याकल गरे पनि भीएआर समीक्षा पछि रेफ्रीले पहेंलो कार्डमै सीमित राखे । धेरैले यसलाई रातो कार्ड हुनुपर्ने बताएका थिए ।

आर्सनलले खेलमा केही थप अवसर बनाए पनि अर्को गोल गर्न सकेन । लियान्द्रो ट्रोसार्डको प्रहार पोस्टमा लागेको थियो भने बुकायो साकाको पेनाल्टी अपिल अस्वीकार गरिएको थियो ।

रक्षात्मक रूपमा भने आर्सनल फेरि मजबुत देखियो । गत महिना सिटीसँग पराजित भएयता टोलीले लगातार चार लिग खेलमा गोल खाएको छैन ।