एएफसी यू–२० महिला एसियन कपः नेपालको महत्त्वपूर्ण जित

काठमाडौं । भुटानको राजधानी थिम्पुमा जारी एएफसी यू–२० महिला एसियन कप छनोटको दोस्रो खेलमा नेपालले साउदी अरेबियालाई १–० ले पराजित गर्दै महत्त्वपूर्ण जित निकालेको छ ।

थिम्पुको चाङलिमिथाङ रंगशालामा शुक्रबार भएको प्रतिस्पर्धात्मक खेलमा निर्णायक गोल खेलको अन्तिम मिनेटमा सम्भव भयो । ९०औं मिनेटमा शुक्रिया मियाँले ट्याप इन गोल गर्दै नेपाललाई तीन अंक दिलाइन् । उनले मिना देउवाको क्रसलाई जाली चुमाउँदै गोलमा परिणत गरेकी हुन् ।

खेलभर साउदी अरेबियाले पनि केही आक्रमण गर्ने अवसरहरू बनाएको थियो, तर त्यसलाई गोलमा परिणत गर्न सकेन । उता, नेपालले ३७औं मिनेटमा पाएको पेनाल्टी गुमायो । मिना देउवाले प्रहार गरेको बल बारमा लागेर फर्किएको थियो ।

यसअघि समूह चरणको पहिलो खेलमा नेपालले आयोजक भुटानसँग १–१ को बराबरी खेलेको थियो । साउदी अरेबियाको यो दोस्रो हार हो— पहिलो खेलमा उसले उत्तर कोरियासँग १५–० को अपमानजनक हार भोगेको थियो ।

बराबरीबाट सुरुआत गरेका कारण समूहविजेता बन्ने नेपालको आशामा केही चुनौती थपिएको छ । अब नेपालले आइतबार बलियो प्रतिद्वन्द्वी उत्तर कोरियासँग भिड्नुपर्नेछ ।

प्रतियोगितामा प्रत्येक समूहको विजेता सिधै यू–२० महिला एसियन कपका लागि छनोट हुनेछन् । साथै, तीन उत्कृष्ट उपविजेता टोलीहरू पनि छनोटमा पर्ने प्रावधान छ ।