कक्षा १२ पुनर्योगका लागि साउन २९ सम्म आवेदन दिन सकिने

काठमाडौं । राष्ट्रिय परीक्षा बोर्डले कक्षा १२ को परीक्षाफलमा असन्तुष्टि जनाएका विद्यार्थीका लागि पुनर्योग (रिभ्युल) प्रक्रिया खुला गरेको छ । पुनर्योगका लागि विद्यार्थीहरूले साउन २९ गतेसम्म अनलाइनमार्फत आवेदन दिन सक्नेछन् ।

बोर्ड अन्तर्गतको परीक्षा नियन्त्रण कार्यालय, सानोठिमीले सोमबार सूचना प्रकाशित गर्दै पुनर्योग गर्न इच्छुक विद्यार्थीलाई तोकिएको म्यादभित्र निवेदन दिन आग्रह गरेको हो । कार्यालयका अनुसार पुनर्योगको आवेदन केवल अनलाइन प्रणालीमार्फत मात्र स्वीकृत हुनेछ ।

गत वैशाख २१ गतेदेखि जेठ २ गतेसम्म सञ्चालन भएको कक्षा १२ को नियमित तथा आंशिक परीक्षाको नतिजा बोर्डले साउन १९ गते सार्वजनिक गरेको थियो ।