गोरुमाथि अमानवीय व्यवहार गर्ने व्यक्ति प्युठानमा पक्राउ

काठमाडौं । प्युठानमा गोरुमाथि क्रूर व्यवहार गरेको आरोपमा एक व्यक्ति पक्राउ परेका छन् । पक्राउ पर्नेमा गौमुखी गाउँपालिका–१ का करिब ३६ वर्षीय जालिराम थापा मगर रहेका छन् ।

प्रहरीका अनुसार थापाले खेत जोत्ने क्रममा गोरु हिँड्न नसकेर खेतमै सुतेपछि त्यसलाई कुटपिट गर्नुका साथै नाक र मुख माटोमा गाडेर अमानवीय व्यवहार गरेका थिए ।

उक्त घटनाको भिडियो आफैंले खिचेर सामाजिक सञ्जालमा सार्वजनिक गरेपछि भिडियो व्यापक रूपमा भाइरल बनेको थियो । त्यसपछि प्रहरीले घटनाबारे अनुसन्धान अघि बढाएको हो ।

थापालाई नियन्त्रणमा लिएर मुलुकी अपराध संहिता, २०७४ अन्तर्गत पशुपन्छीप्रति निर्दयी व्यवहार गर्न नहुने कसुरमा मुद्दा दर्ता गरिएको प्रहरीले जनाएको छ । जिल्ला प्रशासन कार्यालय प्युठानबाट पाँच दिनको म्याद थप गरी घटनाबारे थप अनुसन्धान भइरहेको छ ।