गोरखाका वडाध्यक्ष लामा जर्मनी प्रस्थान, राजनीतिबाट सदाको लागि बिदा

काठमाडौं । गोरखा जिल्लाको चुमनुब्री गाउँपालिका–६ का वडाध्यक्ष सरोज लामा जर्मनी प्रस्थान गरेका छन् । सामाजिक सञ्जाल फेसबुकमार्फत भावुक स्टाटस लेख्दै उनले राजनीतिबाट सदाका लागि बिदा लिएको घोषणा गरेका हुन् ।

लामाले आफ्नो कार्यकालमा सकेसम्म सबैको चित्त बुझाउने गरी इमानदारीपूर्वक काम गरेको बताए । तर, आफ्नो प्रयास र योगदानलाई कहिल्यै उचित मूल्याङ्कन नभएको भन्दै असन्तुष्टि प्रकट गरेका छन् ।

‘सकेसम्म सबैको चित्त बुझाउने गरी इमानदारीताका साथ मेरो क्षमताले भ्याएसम्मको भूमिका र कार्य सम्पादन गरियो । तर जति गर्दा पनि जस नपाउने कामले आत्मसन्तुष्टि भएन । त्यसैले अबदेखि यो राजनीतिबाट सदाको लागि बिदा भएको निर्णयसहित जिन्दगीलाई पुनः शून्य अर्थात् जिरोबाट सुरु गर्न परदेश लागेको हुँ,’ उनले फेसबुकमा लेखेका छन् ।

वडाध्यक्ष लामाले गाउँपालिकामा आधिकारिक पत्र पठाई वडा सदस्य ठिन्ले घ्याम्छो लामालाई कार्यवाहक अध्यक्षको जिम्मेवारी दिएका छन् ।

गाउँपालिकाका सूचना अधिकारी सन्दीप रेग्मीका अनुसार वडाध्यक्ष लामाले प्रस्थान गर्नु अघि नै जिम्मेवारी तोकेर पत्र पठाएका थिए । “उहाँले वडा सदस्य ठिन्ले घ्याम्छो लामालाई अध्यक्षको जिम्मेवारी दिएको पत्र आएको छ । तर उहाँ फर्किने वा नफर्किने भन्नेबारे कुनै जानकारी आएको छैन,” रेग्मीले बताए ।

लामा माओवादी केन्द्रको तर्फबाट निर्वाचित भएका थिए । वडाध्यक्षको जिम्मेवारी सम्हाल्दै आएका बेला उनले विदेशी भूमिबाट नयाँ जीवन यात्रा सुरु गर्ने निर्णय गरेका छन् ।

उनको यो कदमलाई कतिपयले व्यक्तिगत निराशा र अवसरको खोजीको परिणामका रूपमा लिएका छन् भने कतिपयले गाउँ र जिल्लाको राजनीतिमा यसको असर पर्ने बताइरहेका छन् ।