दुर्गन्धित शव हेलिकोप्टरबाट ओसार्न समस्या, टिमुरे–स्याफ्रुबेँसीमा व्यवस्थापन चुनौती

काठमाडौं । भोटेकोशीमा आएको विनाशकारी बाढीपछि रसुवाको टिमुरे र स्याफ्रुबेँसी क्षेत्रमा फेला परेका शव व्यवस्थापनमा समस्या देखिएको छ । लामो समयदेखि थुप्रिएका शव दुर्गन्धित हुन थालेपछि उद्धारमा प्रयोग भइरहेका निजी हेलिकोप्टरबाट शव ओसार्न कठिनाइ भएको हो ।

निजी हेलिकोप्टर कम्पनीहरूले खुला अवस्थामा शवलाई हेलिकोप्टरभित्र राखेर अन्यत्र लैजान नसकिने जनाएका छन् । दुर्गन्ध फैलिने तथा स्वास्थ्य र सुरक्षासम्बन्धी जोखिम हुने भएकाले शव ओसार्न वैकल्पिक व्यवस्था आवश्यक परेको हो ।

यसका लागि शवलाई सुरक्षित रूपमा राखेर हेलिकोप्टरबाट ढुवानी गर्न विशेष ‘बकेट’ मगाउने तयारी भइरहेको छ । बकेटको प्रयोगबाट हेलिकोप्टरभित्र दुर्गन्ध फैलिन नदिई शवलाई सुरक्षित रूपमा प्रभावित क्षेत्रबाट अन्यत्र लैजान सहज हुने अपेक्षा गरिएको छ ।

भोटेकोशी बाढीपछि रसुवा, नुवाकोटलगायत प्रभावित क्षेत्रमा नेपाली सेना, नेपाल प्रहरी, सशस्त्र प्रहरी र निजी क्षेत्रका हेलिकोप्टरमार्फत खोज तथा उद्धार अभियान जारी छ । उद्धारका क्रममा थप शव फेला पर्ने क्रमसँगै तिनको सुरक्षित व्यवस्थापन पनि चुनौतीका रूपमा देखिएको छ ।