ब्रेक फेल भई ट्याक्टर दुर्घटना, दुई मजदुरको ज्यान गयो

भक्तपुर । भक्तपुरको चाँगुनारायण नगरपालिका–८ कलमसी क्षेत्रमा गएराति भएको ट्याक्टर दुर्घटनामा दुई जनाको मृत्यु भएको छ भने अन्य छ जना घाइते भएका छन् ।

जिल्ला प्रहरी परिसर भक्तपुरका अनुसार दुर्घटनामा ज्यान गुमाउने दुवै पुरुषको परिचय खुल्न बाँकी छ । घाइतेहरूको उपचार भइरहेको प्रहरीले जनाएको छ ।

प्रहरीका अनुसार सडक ढलानको काम सम्पन्न गरेर डेरातर्फ फर्किरहेका मजदुरहरू सवार ट्याक्टर अनियन्त्रित भई दुर्घटनामा परेको हो । ट्याक्टरमा चालकसहित १२ जना रहेका थिए ।

प्रारम्भिक अनुसन्धानबाट ट्याक्टरको ब्रेक फेल भएपछि दुर्घटना भएको देखिएको प्रहरीले जनाएको छ । घटनाबारे थप अनुसन्धान जारी रहेको छ ।