स्वकीय सचिव नियुक्तिमा रास्वपाको नयाँ मापदण्ड, आफन्त राख्न नपाइने

काठमाडौं । राष्ट्रिय स्वतन्त्र पार्टी (रास्वपा) ले संघीय सांसदका स्वकीय सचिव नियुक्ति प्रक्रियालाई थप व्यवस्थित, पारदर्शी र उत्तरदायी बनाउन नयाँ आन्तरिक निर्देशन लागू गरेको छ । पार्टीले सांसदहरूलाई स्वकीय सचिव छनोट गर्दा स्पष्ट मापदण्ड पालना गर्न निर्देशन दिएको हो ।

जारी गरिएको निर्देशनअनुसार सांसदहरूले आफ्नै परिवारका सदस्य वा नजिकका नातेदारलाई स्वकीय सचिवका रूपमा नियुक्त गर्न पाउने छैनन् । नातावाद र परिवारवाद अन्त्य गर्दै योग्यता र क्षमताका आधारमा परिवारबाहिरका व्यक्तिलाई छनोट गर्नुपर्ने व्यवस्था गरिएको पार्टीले जनाएको छ ।

स्वकीय सचिव बन्न चाहने व्यक्तिले संघीय संसद सचिवालयले तोकेको न्यूनतम शैक्षिक योग्यता पूरा गरेको हुनुपर्नेछ । स्नातक तह वा सोसरह उत्तीर्ण, सम्बन्धित क्षेत्रमा अनुभव र दक्षता, सूचना प्रविधिको प्रयोगमा सक्षम तथा अनुसन्धान क्षमता भएका उम्मेदवारलाई प्राथमिकता दिन निर्देशनमा उल्लेख छ । साथै, पार्टीको नीति, सिद्धान्त र मूल्य–मान्यताप्रति प्रतिबद्धता पनि छनोटको महत्त्वपूर्ण आधार हुने जनाइएको छ ।

त्यसैगरी, योग्यता पुगेका उम्मेदवारमध्ये महिला, सीमान्तकृत समुदाय र पछाडि पारिएका वर्गका व्यक्तिलाई प्राथमिकता दिन सांसदहरूलाई रास्वपाले आग्रह गरेको छ । पार्टीका अनुसार यो व्यवस्था समावेशी प्रतिनिधित्व, सुशासन र जनउत्तरदायी अभ्यासलाई संस्थागत गर्ने उद्देश्यले लागू गरिएको हो ।