आमाको सपना पूरा गर्दै दीपमाला ढकाल बनिन् मिस नेपाल–२०२६

काठमाडौं । दीपमाला ढकालले मिस नेपाल–२०२६ को प्रतिष्ठित उपाधि जितेकी छन् । शनिबार काठमाडौंमा सम्पन्न ग्रान्ड फिनालेमा २३ प्रतिस्पर्धीलाई पछि पार्दै उनले ताज आफ्नो नाममा गरेकी हुन् । प्रतियोगिता द हिडन ट्रेजरले आयोजना गरेको थियो ।

हङकङमा बसोबास गर्दै आएकी दीपमाला यसअघि मिस नेपाल हङकङ इन्टरनेसनल–२०२५ की विजेता समेत हुन् । फाइनान्स एन्ड इकोनोमिक्स विषयमा स्नातक गरेकी उनले विश्वप्रसिद्ध लगानी व्यवस्थापन कम्पनी ‘ब्ल्याकरक’मा समेत काम गरिसकेकी छन् । तर, आमाले पूरा गर्न नसकेको सपना साकार पार्ने उद्देश्यले उनले आकर्षक जागिर त्यागेर मिस नेपाल प्रतियोगितामा सहभागी हुन नेपाल फर्किएकी थिइन् ।

दीपमालाकी आमा पनि सन् १९९४ को मिस नेपाल प्रतियोगिताकी प्रतिस्पर्धी थिइन् । तीन दशकअघि अधुरो रहेको त्यही सपना छोरीले मिस नेपालको ताज जित्दै पूरा गरेकी हुन् ।

सौन्दर्य प्रतियोगितासँगै दीपमाला खेलकुदमा पनि सक्रिय छिन् । उनी तेक्वान्दो खेलाडी हुनुका साथै म्याराथन धावकको रूपमा समेत परिचित छन् ।

यसै प्रतियोगितामा आर्या निशान्तले मिस नेपाल इन्टरनेसनल–२०२६ को उपाधि जितिन् भने कोसिस सुब्बा मिस नेपाल कस्मो–२०२६ घोषित भइन् ।