कांग्रेसको १५औँ महाधिवेशन पुस २६ देखि २८ गते हुने

काठमान्डु । नेपाली कांग्रेसले आगामी पुस २६, २७ र २८ गते १५औँ महाधिवेशन आयोजना गर्ने निर्णय गरेको छ । सोमबार बसेको केन्द्रीय कार्यसमिति बैठकपछि प्रवक्ता डा. प्रकाशशरण महतले नियमित महाधिवेशनको मिति आधिकारिक रूपमा सार्वजनिक गरेका हुन् ।

बैठकमा पार्टी संरचना, आगामी राजनीतिक चुनौती र संगठन सुदृढीकरणका विषयमा विस्तृत छलफल भएको बताइन्छ । महाधिवेशनलाई सफल बनाउन विभिन्न समितिहरू गठन गर्दै पार्टीले अब आन्तरिक तयारी तीव्र पारेको छ ।

यसैबीच, १४औँ महाधिवेशनबाट निर्वाचित वर्तमान कार्यसमितिको म्याद आगामी माघ मसान्तसम्मका लागि थपिएको छ । यसअघि कार्यसमितिको कार्यकाल मंसिर मसान्तमै सकिँदै थियो । म्याद थपिएसँगै कार्यसमितिले आगामी महाधिवेशन तयारीलाई अझ प्रभावकारी रूपमा अघि बढाउन सक्ने विश्वास लिइएको छ ।

पार्टीभित्रका नेतृत्व चयन, नीति निर्धारण र संगठनात्मक पुनर्गठनका दृष्टिले १५औँ महाधिवेशन महत्वपूर्ण मानिँदै आएको छ । कांग्रेसभित्रका नेताहरूले यो महाधिवेशनले पार्टीलाई नयाँ दिशातर्फ लैजाने अपेक्षा व्यक्त गर्दै आएका छन् ।