राष्ट्रिय सभामा कांग्रेसको दल नेतामा कमला पन्त

काठमाडौं । नेपाली कांग्रेसले राष्ट्रिय सभामा आफ्नो दलको नेतृत्व परिवर्तन गर्दै कमला पन्तलाई नयाँ दल नेताको जिम्मेवारी दिएको छ । संसदीय दलका नेता भीष्मराज आङ्देम्बेले आज पन्तलाई उक्त पदमा मनोनीत गरेका हुन् ।

कांग्रेसको विधानअनुसार संसदीय दल नेताले राष्ट्रिय सभा दल नेता तोक्ने व्यवस्था रहेको छ । सोही अधिकार प्रयोग गर्दै आङ्देम्बेले यसअघि दल नेताको भूमिकामा रहेका कृष्णप्रसाद सिटौलालाई हटाएर पन्तलाई जिम्मेवारी दिएका हुन् । सिटौलालाई भने पूर्व संसदीय दल नेता शेरबहादुर देउवाले उक्त पदमा नियुक्त गरेका थिए ।

नवनियुक्त दल नेता पन्त कांग्रेसभित्र अनुभवी नेताका रूपमा परिचित छन् । उनी गोरखाबाट २०५१ र २०५६ सालमा प्रतिनिधिसभा सदस्य निर्वाचित भइसकेकी छन् । त्यस्तै, उनी महिला, बालबालिका तथा समाज कल्याण राज्यमन्त्रीको जिम्मेवारी पनि सम्हालिसकेकी छन् ।

हाल पन्त गण्डकी प्रदेशबाट राष्ट्रिय सभा सदस्यका रूपमा कार्यरत छिन् ।