रसुवा बाढीबारे छलफल गर्न रास्वपा सभापति लामिछानेको आह्वानमा सर्वदलीय बैठक

काठमाडौं । रसुवामा आएको भीषण बाढीपछि उत्पन्न परिस्थितिबारे छलफल गर्न राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा आज सर्वदलीय बैठक बस्दैछ ।

रास्वपा प्रवक्ता जगदीश खरेलका अनुसार बैठक बिहान ९ः०० बजे सिंहदरबारस्थित रास्वपा संसदीय दलको कार्यालयमा हुनेछ ।

बैठकमा बाढीबाट प्रभावित क्षेत्रमा भइरहेको खोज तथा उद्धार, राहत व्यवस्थापन र पछिल्लो अवस्थाबारे जानकारी आदानप्रदान गरिनेछ । साथै, विपद्को अवस्थामा राजनीतिक दलहरूबीच आवश्यक समन्वय कसरी गर्ने तथा आगामी दिनमा चाल्नुपर्ने कदमबारे पनि छलफल हुने प्रवक्ता खरेलले बताए ।

रसुवागढी क्षेत्रलगायत विभिन्न स्थानमा बाढीले ठूलो जनधन तथा भौतिक क्षति पुर्‍याएको छ । प्रभावित क्षेत्रमा सुरक्षाकर्मी र सम्बन्धित सरकारी निकायले खोज, उद्धार तथा राहतका कामलाई निरन्तरता दिइरहेका छन् ।