कक्षा १२ को नतिजा सार्वजनिकः पाँच वर्षयताकै उच्च ६४.१३ प्रतिशत विद्यार्थी उत्तीर्ण

काठमाडौं । राष्ट्रिय परीक्षा बोर्डले कक्षा १२ को नियमित तथा आंशिकतर्फको परीक्षाफल शुक्रबार सार्वजनिक गरेको छ । यस वर्षको नतिजाअनुसार कुल ६४.१३ प्रतिशत विद्यार्थी उत्तीर्ण भएका छन्, जुन पछिल्लो पाँच वर्षयताकै उच्च सफलता दर हो ।

बोर्डका अनुसार सबै विषयमा ग्रेड प्राप्त गर्ने विद्यार्थीको संख्या २ लाख ६८ हजार १९० रहेको छ । यसमध्ये नियमिततर्फ २ लाख ३१ हजार ७७० र आंशिकतर्फ ३६ हजार ४२० विद्यार्थी रहेका छन् ।

नतिजा अनुसार नियमिततर्फ ६९.७५ प्रतिशत र आंशिकतर्फ ४२.३८ प्रतिशत विद्यार्थीले सबै विषयमा ग्रेड प्राप्त गरेका छन् ।

यस वर्षको नतिजाले अघिल्लो वर्षको तुलनामा सुधार देखाएको छ । २०८२ सालमा ६१.१७ प्रतिशत विद्यार्थी उत्तीर्ण भएका थिए भने यस वर्ष उक्त दर करिब ३ प्रतिशतले बढेर ६४.१३ प्रतिशत पुगेको छ ।

पछिल्ला वर्षहरूको तथ्यांक हेर्दा २०७८ मा ४६.४ प्रतिशत, २०७९ मा ५१.९१ प्रतिशत, २०८० मा ५०.९१ प्रतिशत र २०८१ मा ५२.९१ प्रतिशत विद्यार्थी उत्तीर्ण भएका थिए । यस आधारमा २०८३ सालको नतिजा पछिल्लो पाँच वर्षकै उत्कृष्ट रहेको बोर्डले जनाएको छ ।

विद्यार्थीहरुले आफ्नो नतिजा राष्ट्रिय परीक्षा बोर्डको वेबसाइट result.neb.gov.np वा neb.gov.np तथा नेपाल टेलिकमको वेबसाइट https://neb.ntc.net.np बाट हेर्न सकिनेछ ।