सुशीला कार्कीले आज राति प्रधानमन्त्रीको रूपमा शपथ ग्रहण गर्ने

काठमाडौं । नेपालमा अन्तरिम सरकारको नेतृत्व गर्दै पूर्व प्रधानन्यायाधीश सुशीला कार्की आजै प्रधानमन्त्रीको रूपमा शपथ ग्रहण गर्ने भएकी छन् । राष्ट्रपतिद्वारा आज राति ८ः४५ बजे शीतल निवासमा विशेष समारोहका बीच नयाँ प्रधानमन्त्रीको शपथ कार्यक्रम तय गरिएको छ ।

राष्ट्रपतिको प्रेस सल्लाहकार किरण पोखरेलका अनुसार, राष्ट्रपतिले पहिलोपटक अन्तरिम सरकारको प्रधानमन्त्रीको रूपमा कार्कीलाई नियुक्त गर्नेछन् । त्यसपछि शपथ ग्रहण गरी उनी कार्यभार सम्हाल्नेछिन् ।

पोखरेलले भने, “पहिला राष्ट्रपतिज्यूले अन्तरिम सरकारको नयाँ प्रधानमन्त्रीज्यूलाई नियुक्त गर्नुहुन्छ । अनि नयाँ प्रधानमन्त्रीज्यूले मन्त्रिपरिषदको काम अगाडि बढाउनु हुन्छ ।”

यसअघि कार्की प्रधानन्यायाधीशको रूपमा सेवा गरिसकेकी छन् र नेपालमा महिला नेतृत्वका हिसाबले यो ऐतिहासिक कदमका रूपमा हेरिएको छ । अन्तरिम सरकारको प्रमुखको रूपमा अब उनले निर्वाचनसम्म देशको प्रशासनिक र राजनीतिक नेतृत्व सम्हाल्नेछिन् ।