वेस्ट इन्डिजविरुद्ध दोस्रो टी–२० खेलमा नेपाल आज मैदानमा, ऐतिहासिक सिरिज जितको अवसर

काठमाडौं । वेस्ट इन्डिजविरुद्धको ऐतिहासिक टी–२० अन्तर्राष्ट्रिय सिरिजको दोस्रो खेलमा नेपाल आज (सोमबार) राति मैदानमा उत्रिनेछ । खेल यूएईको सारजाह क्रिकेट मैदानमा राति नेपाली समयअनुसार ८ः१५ बजे सुरु हुनेछ ।

तीन खेलको सिरिज अन्तर्गत ‘युनिटी कप’ नाम दिइएको प्रतियोगितामा नेपालले पहिलो खेलमा १९ रनले कीर्तिमानी जित हात पारेको थियो । सो जितसँगै नेपालले पूर्ण टेस्ट मान्यता प्राप्त टोलीविरुद्ध पहिलो पटक ऐतिहासिक सफलता पाएको थियो ।

आजको खेलमा नेपालले पुनः विजय हासिल गरेमा सिरिज एक खेल अगावै आफ्नो पक्षमा पार्नेछ । यससँगै नेपाली क्रिकेटले अर्को ऐतिहासिक उपलब्धि हात पार्ने सम्भावना रहेको छ ।

वेस्ट इन्डिजका लागि भने यो खेल निकै महत्त्वपूर्ण छ । पहिलो खेलमा पराजित टोलीले सिरिज बराबरी गर्न जित्नैपर्ने दबाब छ ।

दोस्रो जितका लागि नेपालले आजको खेलमा पनि उत्कृष्ट प्रदर्शन जारी राख्नुपर्नेछ । खेलप्रेमीहरू बीच यस सिरिजले ठूलो उत्साह ल्याएको छ भने नेपाली टोलीको प्रदर्शनले राष्ट्रिय क्रिकेटको स्तर उच्च बनाउँदै लगेको देखिएको छ ।