दलाई लामाको जन्मोत्सव मनाइएको घटनाप्रति सात पूर्वराजदूतको आपत्ति, सरकारसँग स्पष्टीकरणको माग

काठमाडौं । नेपालमा दलाई लामाको ९१औँ जन्मोत्सव मनाइएको घटनालाई लिएर चीनका लागि नेपालका सात जना पूर्वराजदूतले गम्भीर चासो व्यक्त गर्दै सरकारसँग स्पष्ट जवाफ माग गरेका छन् । उनीहरूले संयुक्त वक्तव्य जारी गर्दै उक्त कार्यक्रम सरकारको जानकारी वा सहमतिमा भएको हो भने त्यसले नेपालको परराष्ट्र नीतिमाथि प्रश्न उठाउने बताएका छन् ।

संयुक्त वक्तव्यमा पूर्वराजदूतहरू राजेश्वर आचार्य, महेन्द्र पाण्डे, टंक कार्की, महेश मास्के, लीलामणि पौडेल, विष्णुपुकार श्रेष्ठ र कृष्णप्रसाद ओलीले हस्ताक्षर गरेका छन् । उनीहरूले नेपालले दशकौँदेखि निरन्तर अवलम्बन गर्दै आएको ‘एक–चीन नीति’सँग यस्ता गतिविधि मेल नखाने उल्लेख गरेका छन् ।

गत असार २२ गते काठमाडौंको नागार्जुन नगरपालिका–२ स्थित नामग्याल विद्यालयमा दलाई लामाको ९१औँ जन्मदिन मनाइएको समाचार सार्वजनिक भएपछि उनीहरूले त्यसप्रति औपचारिक धारणा सार्वजनिक गरेका हुन् । वक्तव्यमा सरकारले कार्यक्रमलाई स्वीकृति दिएको हो वा होइन भन्ने विषयमा स्पष्ट पार्न आग्रह गरिएको छ ।

पूर्वराजदूतहरूको भनाइमा यदि राज्यको सहमतिमा यस्तो कार्यक्रम आयोजना गरिएको हो भने त्यसले नेपाल–चीन सम्बन्धमा स्थापित विश्वासमा असर पार्न सक्नेछ । साथै, नेपालले अवलम्बन गर्दै आएको सन्तुलित भू–राजनीतिक नीति कमजोर बन्ने जोखिम पनि रहने उनीहरूको चेतावनी छ ।

वक्तव्यमा नेपालले विगतदेखि आफ्नो भूमिबाट कुनै पनि मित्र राष्ट्रविरुद्ध गतिविधि हुन नदिने प्रतिबद्धता दोहोर्याउँदै आएको स्मरण गराइएको छ । परराष्ट्रमन्त्री शिशिर खनालको हालै सम्पन्न चीन भ्रमणका क्रममा पनि यही प्रतिबद्धता पुनः व्यक्त गरिएको उल्लेख गर्दै उनीहरूले अहिलेको घटनाले नेपालको परराष्ट्र नीतिमा कुनै परिवर्तन आएको हो भन्ने प्रश्न उठाएका छन् ।

पूर्वराजदूतहरूले यस्ता संवेदनशील विषयमा सरकारले अत्यन्त सावधानी अपनाउनुपर्ने आवश्यकता औँल्याएका छन् । उनीहरूका अनुसार छिमेकी राष्ट्रसँगको सम्बन्धलाई असर पार्ने गतिविधिले मुलुकको स्थायित्व, विकास र स्वतन्त्र परराष्ट्र नीतिमा दीर्घकालीन प्रभाव पार्न सक्छ ।

उता, दलाई लामाको जन्मोत्सव आयोजना हुनुअघि नै जिल्ला प्रशासन कार्यालय काठमाडौंले जिल्ला सुरक्षा समितिको बैठक बोलाएर कार्यक्रमबारे छलफल गरेको जानकारी समेत सार्वजनिक भएको छ ।