सुनसरी घटनापछि मोरङमा डिजेमाथि प्रतिबन्ध, उल्लंघन गरे कानुनी कारबाही हुने

काठमाडौं । सुनसरीको देवानगन्ज गाउँपालिका–३ स्थित कप्तानगन्ज बजारमा डिजे बजाउने विषयलाई लिएर भएको हिंसात्मक घटनापछि मोरङ जिल्लामा पनि डिजेको प्रयोगमा रोक लगाइएको छ ।

जिल्ला प्रशासन कार्यालय मोरङले मंगलबार सार्वजनिक सूचना जारी गर्दै अर्को आदेश नभएसम्म जिल्लाभर कुनै पनि प्रकारका सार्वजनिक वा निजी कार्यक्रममा डिजे प्रयोग गर्न नपाइने जनाएको हो । प्रशासनका अनुसार विवाह, मेला–महोत्सव, पार्टी, चाडपर्व, धार्मिक कार्यक्रम, पुराण तथा अन्य सबै प्रकारका सभा–समारोहमा यो निर्णय लागू हुनेछ ।

सहायक प्रमुख जिल्ला अधिकारी पवनराज कोइरालाद्वारा जारी सूचनामा प्रतिबन्धको अवज्ञा गरी डिजे बजाएको वा बजाउन दिएको पाइएमा प्रचलित कानुनअनुसार कारबाही गरिने स्पष्ट उल्लेख गरिएको छ । प्रशासनले सबै नागरिकलाई निर्णयको पालना गर्न आग्रह समेत गरेको छ ।

गत आइतबार सुनसरीको कप्तानगन्ज बजारमा चर्को आवाजमा डिजे बजाएको विषयलाई लिएर दुई समुदायबीच विवाद उत्पन्न भएको थियो । सामान्य भनाभनबाट सुरु भएको विवाद पछि झडपमा परिणत हुँदा सुरक्षा अवस्था तनावग्रस्त बनेको थियो ।

झडप नियन्त्रणका क्रममा सुरक्षाकर्मीले चलाएको गोली लागेर एक जनाको मृत्यु भएको छ । घटनापछि कप्तानगन्ज तथा आसपासका क्षेत्रमा लगातार दुई दिनदेखि कर्फ्यू जारी रहेको छ भने सुरक्षा व्यवस्था कडा पारिएको छ । प्रशासनले शान्ति–सुरक्षा कायम राख्न आवश्यक सतर्कता अपनाइरहेको जनाएको छ ।