कैलाली कारागारमा सुरक्षाकर्मीको प्रवेश, ४० घण्टापछि खोजतलास सुरु

कैलाली । कैदीबन्दीको नियन्त्रणमा रहेको कैलाली कारागारमा ४० घण्टा लामो तनावपछि नेपाल प्रहरी र सशस्त्र प्रहरीको संयुक्त टोली भित्र छिरेको छ ।

शनिबार कैदीबन्दीका दुई समूहबीच भएको झडपपछि कारागार तनावग्रस्त बनेको थियो । घटनापछि भित्रबाट ढोका बन्द गरेर कैदीबन्दीहरूले सम्पूर्ण थुनुवा कक्ष कब्जामा लिँदा सुरक्षाकर्मीलाई प्रवेश गर्न दिइएको थिएन ।

आइतबार अपरान्ह मानव अधिकार प्रदेश कार्यालय, धनगढीको रोहबरमा हतियारसहितको संयुक्त टोली ब्लक ‘ए’ र ब्लक ‘बी’ मा छिरेर अवस्थाको निरीक्षण तथा खोजतलास थालेको हो ।

यो हिंसात्मक घटनामा एकजनाको मृत्यु भएको छ भने ४९ जना घाइते भएका छन् । कैदीबन्दीहरूको वास्तविक संख्या समेत स्पष्ट नभएकाले सुरक्षाकर्मीले भित्रैबाट गणना गर्ने कार्य पनि सुरु गरेका छन् ।