देशभर वर्षाको सम्भावना, केही क्षेत्रमा भारी वर्षा हुने चेतावनी

काठमाडौं । देशभर मनसुनी वायु सक्रिय रहेकाले आज पनि अधिकांश क्षेत्रमा वर्षाको सम्भावना रहेको छ । जल तथा मौसम पूर्वानुमान महाशाखाका अनुसार मनसुनको न्यून चापीय रेखा नेपालको पूर्वी भागमा सरदर स्थानको आसपास तथा पश्चिमी भागमा सरदरभन्दा उत्तरतर्फ रहेकाले मौसममा यसको प्रभाव कायम रहेको हो ।

हाल देशभर सामान्यदेखि पूर्ण बदलीको अवस्था छ । बागमती, गण्डकी, कर्णाली र सुदूरपश्चिम प्रदेशका केही स्थानमा तथा लुम्बिनी र मधेस प्रदेशका एक–दुई स्थानमा हल्कादेखि मध्यम वर्षा भइरहेको महाशाखाले जनाएको छ ।

महाशाखाका अनुसार आज दिउँसो हिमाली र पहाडी भूभागका अधिकांश क्षेत्रमा सामान्य बदली रहनेछ भने बागमती, गण्डकी, लुम्बिनी र सुदूरपश्चिमका तराई क्षेत्रमा पनि बदली रहने सम्भावना छ । कोशी र मधेस प्रदेशको तराई क्षेत्रमा भने आंशिक बदली रहने अनुमान गरिएको छ ।

दिउँसो हिमाली क्षेत्रका केही तथा पहाडी क्षेत्रका धेरै स्थानमा चट्याङसहित मध्यम वर्षा हुने सम्भावना रहेको छ । लुम्बिनी र सुदूरपश्चिमका तराईका धेरै स्थान, बागमती र गण्डकीका केही तराई क्षेत्र तथा कोशी र मधेसका केही स्थानमा पनि वर्षाको सम्भावना रहेको छ । साथै लुम्बिनी र सुदूरपश्चिमका पहाडी तथा तराई क्षेत्रसँगै बागमती, गण्डकी र कर्णालीका पहाडी भूभागका एक–दुई स्थानमा भारी वर्षा हुन सक्ने भएकाले सतर्कता अपनाउन आग्रह गरिएको छ ।

आज राति पनि देशका हिमाली र पहाडी भूभाग तथा कोशी, मधेस, बागमती र गण्डकी प्रदेशका तराई क्षेत्रमा सामान्य बदली रहनेछ भने लुम्बिनी र सुदूरपश्चिमका तराई क्षेत्रमा आंशिक बदली रहने अनुमान छ ।

रातिको समयमा हिमाली क्षेत्रका थोरै र पहाडी क्षेत्रका केही स्थानमा चट्याङसहित मध्यम वर्षा हुन सक्नेछ । त्यस्तै बागमती, गण्डकी र लुम्बिनीका तराईका केही स्थान, कोशी र सुदूरपश्चिमका तराई क्षेत्र तथा मधेसका थोरै स्थानमा पनि वर्षाको सम्भावना रहेको छ । बागमती, गण्डकी र लुम्बिनी प्रदेशका पहाडी तथा तराईका एक–दुई स्थानमा भारी वर्षा हुन सक्ने भएकाले नदी, खोला तथा पहिरोको जोखिम भएका क्षेत्रमा आवश्यक सावधानी अपनाउन मौसमविद्ले सुझाव दिएका छन् ।