निर्वाचन आचारसंहिताका कारण नेफिनको ११औँ राष्ट्रिय महाधिवेशन स्थगित

काठमाडौं । नेपाल आदिवासी जनजाति महासंघ (नेफिन) ले माघ ९ र १० गते विराटनगरमा आयोजना गर्न लागेको ११औँ राष्ट्रिय महाधिवेशन स्थगन गरिएको छ । प्रतिनिधिसभा निर्वाचनका लागि निर्वाचन आयोगले लागू गरेको आचारसंहिताका कारण महाधिवेशन हाललाई स्थगित गर्नुपरेको महासंघले जनाएको छ ।

महासंघले सार्वजनिक गरेको प्रेस विज्ञप्तिअनुसार महाधिवेशन आयोजना गर्ने निर्णय भई सम्पूर्ण तयारी अन्तिम चरणमा पुगेकै बेला निर्वाचन आयोगले आचारसंहिता लागू गरेको थियो । साथै, निर्वाचन आयोगबाट महाधिवेशन नगर्न पत्राचार भइसकेको र जिल्ला प्रशासन कार्यालय मोरङले पनि कार्यक्रम सञ्चालनका लागि स्वीकृति नदिएपछि अर्को निर्णय नभएसम्म महाधिवेशन स्थगन गर्ने निर्णय गरिएको जनाइएको छ ।

महाधिवेशनका लागि देशभरका आदिवासी जनजाति समुदायलाई सहभागिताका लागि आह्वान गरिसकिएको, तथा महासंघ आबद्ध संस्थाका प्रतिनिधि, पर्यवेक्षक, अतिथि, सल्लाहकार र अभियन्ताहरूलाई समेत निमन्त्रणा गरिसकिएको अवस्थामा अचानक कार्यक्रम स्थगन गर्नुपर्दा पर्न गएको असुविधाप्रति महासंघले दुःख व्यक्त गरेको छ ।

प्रेस विज्ञप्तिमा निर्वाचन प्रक्रिया सम्पन्न भएपछि जातीय घटक सदस्य संगठनहरू तथा सम्बन्धित निकायहरूसँग आवश्यक छलफल गरी ११औँ राष्ट्रिय महाधिवेशनको नयाँ मिति तोकी पुनः आयोजना गरिने उल्लेख गरिएको छ । यससम्बन्धी थप जानकारी समयमै सार्वजनिक गरिने महासंघले जनाएको छ ।

नेपाल आदिवासी जनजाति महासंघका अध्यक्ष गेल्जे लामा शेर्पाद्वारा हस्ताक्षरित विज्ञप्तिमा सम्पूर्ण सरोकारवाला निकाय, सदस्य संस्था तथा समुदायसँग धैर्य र सहकार्यका लागि आग्रह गरिएको छ ।