उपसभामुख राना हटाउन कांग्रेस–एमाले सक्रिय, हस्ताक्षर संकलन तीव्र

काठमाडौं । नेपाली कांग्रेस र नेकपा एमालेले प्रतिनिधिसभाकी उपसभामुख इन्दिरा रानालाई पदबाट हटाउन प्रक्रिया अगाडि बढाउने तयारी गरेका छन् । त्यसका लागि दुुई दलले आफ्ना सांसदहरूबाट हस्ताक्षर संकलन सुरु गरेका हुन् ।

मंगलबार बिहानदेखि सिंहदरबारस्थित संसदीय दलको कार्यालयमा सांसदहरूलाई बोलाएर कांग्रेस र एमालेले हस्ताक्षर अभियान थालेका छन् । उपसभामुख रानामाथि अमेरिकी राजदूतावासमा आफ्नो लेटरप्याड प्रयोग गरेर अमेरिका लैजाने भिसा सिफारिसको पत्र पठाएको आरोप छ ।

कांग्रेसले पदाधिकारी बैठक सकेसँगै आफ्ना सांसदहरूलाई दलको कार्यालयमा उपस्थित हुन भनेको छ । उता एमालेले पनि सांसदहरूलाई दिउँसो २ बजेसम्म हस्ताक्षरका लागि बोलाएको एक सांसदले बताए । सोमबार साँझ बालुवाटारमा कांग्रेस–एमाले शीर्ष नेताहरूबीच भएको बैठकपछि उपसभामुख हटाउने विषयमा सहमति बनेको थियो ।

उक्त बैठकमा महान्यायाधिवक्ता रमेश बडालसमेत उपस्थित थिए । सामाजिक सञ्जाल नियमनसम्बन्धी सर्वोच्च अदालतको फैसलाका साथै उपसभामुख हटाउनेबारे पनि सो बैठकमा चर्चा भएको थियो ।

उपसभामुख रानाविरुद्ध यसअघि पनि हटाउने चलखेल चलेको थियो तर दलहरूबीच सहमति नजुट्दा प्रक्रिया अघि बढ्न सकेको थिएन । यस पटक भने सत्ता गठबन्धनमा रहेका कांग्रेस र एमालेले संयुक्त रूपमा प्रस्ताव अघि बढाउन लागेका हुन् ।