क्लब इतिहासमै पहिलोपटक एमएलएस कप फाइनलमा इन्टर मियामी, न्यूयोर्क सिटीमाथि ५–१ जित

काठमान्डु । इन्टर मियामी सीएफले शनिबार राति फ्लोरिडाको फोर्ट लडरडेलस्थित चेइस स्टेडियममा न्यूयोर्क सिटी एफसीलाई ५–१ ले पराजित गर्दै क्लब इतिहासमै पहिलोपटक एमएलएस कप फाइनलमा प्रवेश गरेको छ । पूर्व कन्फरेन्सको ट्रफी कप्तान लियोनेल मेस्सीले उचाल्दै गर्दा सह–मालिक जोर्गे मासले ‘वन मोर गेम’ अर्थात् ‘अझै एक खेल बाँकी’ भन्ने सन्देश दोहोर्याउँदै आगामी फाइनलमा विजयको लक्ष्य दोहोर्याए ।

‘यो ट्रफी मियामीका फ्यानहरूलाई’ —जोर्गे मास
“यो ट्रफी मियामीका हाम्रा फ्यान, ‘ला फामिलिया’का लागि हो । क्लबले अद्भुत मेहनत गर्‍यो र उत्कृष्ट नतिजा ल्यायो,” मासले भने । “तर अझ महत्वपूर्ण कुरा, यो केवल एक सफलता हो, अब अर्को बाँकी छ —वन मोर ।”

इन्टर मियामीले नियमित सिजनमा भ्यानकुभर ह्वाइटक्याप्सभन्दा उच्च स्थान (६५ अंक) हासिल गरेको कारण यस वर्षको एमएलएस कप उनीहरूले नै घरेलु मैदानमा आयोजना गर्नेछन् । वेस्टर्न कन्फरेन्स विजेता भ्यानकुभरले शनिबार सान डिएगो एफसीलाई ३–१ ले पराजित गर्दै फाइनल बुक गरेको हो ।

‘सबैभन्दा ठूलो लक्ष्य अझै बाँकी छ’ —मुख्य प्रशिक्षक माश्चेराना
मुख्य प्रशिक्षक हाभियर माश्चेरानाले भने, “यो क्लब इतिहासमै ठूलो क्षण हो— कन्फरेन्स च्याम्पियन बन्नु आफैंमा ठूलो उपलब्धि हो । तर सबैभन्दा महत्वपूर्ण कुरा, मुख्य ट्रफी अझै बाँकी छ । यही हाम्रो प्रमुख लक्ष्य हो ।”

अल्लेन्देको दह्रो गोलले मियामीको उडान
ताडेओ अल्लेन्देले खेलको पहिलो २३ मिनेटमै दुई गोल गर्दै मियामीलाई बलियो सुरुवात दिलाए । पहिलो हाफको अन्त्यतिर जस्टिन हाकले न्यूयोर्क सिटीका लागि एक गोल फर्काए पनि गोलरक्षक रोको रिओस नोभो र बचलाइनले न्यूयोर्कको थप आक्रमण रोके ।

दोस्रो हाफमा अगस्टमा मात्र क्लबमा आएका मातेओ सिल्भेट्टीले मेस्सीको असिस्टमा तेस्रो गोल गरे । त्यसपछि टेलास्को सेगोभियाले बेंचबाट आएर अर्को गोल थपे । अल्लेन्देले अन्तिमतिर ह्याट्रिक पूर्ण गर्दै ५–१ को ठोस जित सुनिश्चित गरे । प्लेअफमा आठ गोल गरेका उनलाई ‘म्यान अफ द म्याच’ घोषणा गरियो ।

पहिलो राउन्डबाट फाइनलसम्मको यात्रा
इन्टर मियामीले पहिलो राउन्डमा नेस्भिल एफसीलाई हरायो, त्यसपछि सेमिफाइनलमा एफसी सिन्सिनाटीलाई हराउँदै फाइनलसम्मको यात्रा तय गर्‍यो ।
२०२४, २०२२ र २०२० मा पहिलो राउन्डमै बाहिरिएको मियामीको यो वर्षको पुनरागमन ऐतिहासिक रह्यो ।

स्टेडियममा टेनिस स्टार कार्लोस अल्काराज र USWNT का सदस्यहरू उपस्थित
चेइस स्टेडियममा टेनिस सुपरस्टार कार्लोस अल्काराज तथा अमेरिकी महिला फुटबल टोलीका केही सदस्यहरूले पनि खेल हेरेर मियामीलाई समर्थन गरे ।

अब इन्टर मियामी डिसेम्बर ६, शनिबार, दिउँसो २ बजे (ET) हुने एमएलएस कप फाइनलमा भ्यानकुभर ह्वाइटक्याप्ससँग घरेलु मैदानमा भिड्नेछ।