आज काठमाडौंका विभिन्न क्षेत्रमा विद्युत् सेवा अवरुद्ध हुने

काठमाडौं । नेपाल विद्युत् प्राधिकरणले आज काठमाडौँका केही स्थानमा अस्थायी रूपमा विद्युत् आपूर्ति बन्द हुने जनाएको छ । महाराजगन्ज वितरण केन्द्र अन्तर्गत पर्ने क्षेत्रहरूमा आवश्यक प्राविधिक कार्य गर्न लागिएकाले बिजुली कटौती गर्नुपरेको प्राधिकरणले स्पष्ट पारेको छ ।

काठमाडौं उपत्यका मध्य तथा उत्तर वितरण प्रणाली सुदृढीकरण आयोजनाअन्तर्गत राष्ट्रपति भवन शीतल निवास क्षेत्रको वितरण प्रणालीलाई भूमिगत बनाउने कार्य भइरहेको छ । उक्त कार्य सम्पन्न भइसकेपछि केबलमा आवश्यक उपकरण जडान गर्नुपर्ने भएकाले आज केही घण्टा विद्युत् आपूर्ति अवरुद्ध हुने जनाइएको हो ।

प्राधिकरणका अनुसार पानीपोखरी फिडर अन्तर्गत पर्ने साङ्ग्रिला होटल अगाडिको क्षेत्र, लाजिम्पाट, पानीपोखरी आसपास, महाराजगन्ज तथा त्रिभुवन विश्वविद्यालय शिक्षण अस्पताल वरपरका क्षेत्रमा बिहान ११ बजेदेखि अपराह्न २ बजेसम्म बिजुली बन्द हुनेछ ।

त्यसैगरी राष्ट्रपति भवन, नेपाल प्रहरीको केन्द्रीय अनुसन्धान ब्युरो ९ऋक्ष्द्य० र नेपाल प्रहरी अस्पताल आसपासका क्षेत्रहरूमा पनि सोही समयमा विद्युत् कटौती हुनेछ । बालुवाटार, चुनदेवी र पञ्चकन्या आसपासका बासिन्दाले समेत आज केही समय विद्युत् सेवा अवरुद्धको सामना गर्नुपर्नेछ ।

प्राधिकरणले निर्धारित कार्य समयभन्दा अगाडि नै सम्पन्न भएमा तोकिएको समयभन्दा पहिले नै विद्युत् आपूर्ति पुनः सुचारु हुन सक्ने जानकारी दिएको छ ।