इरानविरुद्ध अमेरिकी सैन्य अभियान रोकियो, कारणबारे फरक–फरक दाबी

काठमाडौं । अमेरिकाले इरानमाथि जारी सैन्य कारबाही तत्कालका लागि रोकेको विभिन्न अन्तर्राष्ट्रिय सञ्चारमाध्यमहरूले जनाएका छन् । तर, कारबाही किन स्थगित गरियो भन्ने विषयमा सार्वजनिक भएका विवरण भने एक–अर्कासँग मेल खाँदैनन् ।

सीएनएनका अनुसार पेन्टागनका एक अधिकारीलाई उद्धृत गर्दै अमेरिकी सैन्य अभियान रोकिएको पुष्टि गरिएको छ । यद्यपि, यो निर्णय कति अवधिसम्म लागू रहने भन्नेबारे कुनै जानकारी दिइएको छैन ।

उता सीबीएस न्युजले भने ओमानको मध्यस्थतामा हुने कूटनीतिक प्रयासलाई अवसर दिन अमेरिकाले सैन्य कारबाही रोकेको जनाएको छ । समाचारअनुसार ओमानको प्रतिनिधिमण्डल ‘स्ट्रेट अफ होर्मुज’ पुनः सञ्चालन गर्ने विषयमा छलफल गर्न तेहरान जाने तयारीमा रहेकाले वार्तामा असर नपरोस् भन्ने उद्देश्यले आक्रमण स्थगित गरिएको हो ।

त्यसैगरी द न्यु योर्क टाइम्सले अमेरिकी राष्ट्रपति डोनाल्ड ट्रम्पले सैन्य अभियान विस्तार गर्ने योजना हाललाई रोकेको जनाएको छ । पत्रिकाका अनुसार अमेरिकी वायु रक्षा प्रणालीमा प्रयोग हुने इन्टरसेप्टर क्षेप्यास्त्रको मौज्दात तीव्र रूपमा घट्दै गएको भन्दै वरिष्ठ सुरक्षा सल्लाहकारहरूले चिन्ता व्यक्त गरेका थिए ।

अमेरिकी सेनाका संयुक्त प्रमुख कर्मचारी समितिका अध्यक्ष डान केनले पनि थप ठूलो स्तरको सैन्य अभियान सञ्चालन गरिए अमेरिकी केन्द्रीय कमान्डसँग रहेका इन्टरसेप्टर क्षेप्यास्त्रको भण्डार जोखिममा पर्ने चेतावनी दिएको दाबी गरिएको छ ।

रिपोर्टहरूका अनुसार इरानविरुद्धको हालसम्मको सैन्य अभियानमा अमेरिकाले १,२०० भन्दा बढी प्याट्रियट इन्टरसेप्टर क्षेप्यास्त्र प्रयोग गरिसकेको छ । प्रत्येक इन्टरसेप्टरको मूल्य ४० लाख अमेरिकी डलरभन्दा बढी पर्ने उल्लेख गरिएको छ ।