समानुपातिकतर्फ ५८ चुनाव चिह्नसहितको नमूना मतपत्र सार्वजनिक

काठमाडौं । आगामी फागुन २१ गते हुने प्रतिनिधिसभा निर्वाचनका लागि निर्वाचन आयोगले समानुपातिकतर्फ प्रयोग हुने ५८ वटा चुनाव चिह्न समेटिएको नमूना मतपत्र सार्वजनिक गरेको छ ।

समानुपातिक निर्वाचन प्रणालीमा सहभागी हुन ९३ राजनीतिक दलले आयोगमा नाम दर्ता गराए पनि तीमध्ये ६४ दलले मात्र समानुपातिक बन्दसूची पेश गरेका थिए । बन्दसूची बुझाउने दलहरूमध्ये ५४ वटा दलले आफ्नै छुट्टाछुट्टै चुनाव चिह्नमार्फत प्रतिस्पर्धा गर्दैछन् भने बाँकी १० दल चारवटा साझा चुनाव चिह्न प्रयोग गरी विभिन्न क्लस्टरमार्फत निर्वाचनमा सहभागी हुँदैछन् ।

यसअघि हुने निर्वाचनमा बन्दसूची बुझाउनुअघि नै मतपत्र छपाइ हुने भएकाले सबै दर्ता भएका दलका चुनाव चिह्न मतपत्रमा समावेश गरिन्थ्यो । तर यसपटक भने समानुपातिक बन्दसूची पेश गरेका दलका मात्रै चुनाव चिह्न समेटेर मतपत्र छपाइ गरिएको आयोगले जनाएको छ ।

आयोगका अनुसार समानुपातिकतर्फको मतपत्र छपाइ कार्य सम्पन्न भइसकेको छ र यसमा जम्मा ५८ वटा मात्रै चुनाव चिह्न समावेश छन् ।

मतपत्रको क्रमअनुसार सबैभन्दा अगाडि नेकपा एमालेको चुनाव चिह्न सूर्य राखिएको छ । त्यसपछि क्रमशः नेपाली कांग्रेसको रुख, नेपाली कम्युनिष्ट पार्टी (नेकपा)को पाँचकुने तारा, राष्ट्रिय स्वतन्त्र पार्टी (रास्वपा)को घण्टी, जनता समाजवादी पार्टीको छाता तथा जनमत पार्टीको माइकसहितका चुनाव चिह्न रहेका छन् । नमूना मतपत्रको अन्त्यमा गाई चुनाव चिह्न समावेश गरिएको छ ।

समानुपातिक तर्फको नमूना मतपत्र