राष्ट्रिय सभा निर्वाचन सम्पन्न, कांग्रेस–एमाले–लोसपाका उम्मेदवार विजयी

काठमाडौं । राष्ट्रिय सभा सदस्यका लागि आज भएको निर्वाचन ९५.६८ प्रतिशत मतदानसहित सम्पन्न भएको छ । बिहान ९ बजेदेखि अपराह्न ३ बजेसम्म चलेको मतदानपछि लगत्तै मतगणना गरी नतिजा सार्वजनिक गरिएको निर्वाचन आयोगले जनाएको छ ।

निर्वाचनमा राष्ट्रिय प्रजातन्त्र पार्टी (राप्रपा) सहभागी भएन । पार्टी प्रवक्ता मोहन श्रेष्ठका अनुसार फागुन २१ मा हुने प्रतिनिधि सभा निर्वाचनलाई प्राथमिकता दिइएकाले राष्ट्रिय सभा निर्वाचनमा मतदान नगर्ने निर्णय गरिएको हो । यसैगरी अन्य दलका केही सांसद तथा स्थानीय तहका प्रतिनिधि पनि मतदानमा अनुपस्थित देखिएका थिए ।

निर्वाचन परिणामअनुसार नेपाली कांग्रेस, नेकपा एमाले र लोकतान्त्रिक समाजवादी पार्टी (लोसपा) का उम्मेदवारहरू विजयी भएका छन् । कांग्रेसले सभापति शेरबहादुर देउवा र कार्यवाहक सभापति पूर्णबहादुर खड्काको नेतृत्वकालमा एमाले र लोसपासँग राष्ट्रिय सभामा तालमेल गर्ने सहमति गरेको थियो । सो सहमतिअनुसार १८ सिटमध्ये कांग्रेसले ९, एमालेले ८ र लोसपाले १ सिटमा उम्मेदवारी दिएका थिए ।

राष्ट्रिय सभामा कुल १९ पद रिक्त हुनेमध्ये एक सदस्य सरकारको सिफारिसमा राष्ट्रपतिबाट नियुक्त हुने व्यवस्था छ भने बाँकी १८ पदका लागि आज निर्वाचन भएको हो ।

प्रदेशगत निर्वाचित सदस्यहरू

कोशी प्रदेश
– सुनिलबहादुर थापा (नेपाली कांग्रेस) — निर्विरोध
– रोशनी मेचे (नेकपा एमाले)
– सोमनाथ पोर्तेल (नेकपा एमाले)

मधेस प्रदेश
– धमेन्द्र पासवान (नेपाली कांग्रेस)
– रञ्जित कर्ण (नेपाली कांग्रेस)
– महन्थ ठाकुर (लोसपा)
– रेखाकुमारी झा (नेकपा एमाले)

बागमती प्रदेश
– गीता देवकोटा (नेपाली कांग्रेस)
– प्रेमप्रसाद दंगाल (नेकपा एमाले)

गण्डकी प्रदेश
– सम्झना देवकोटा (नेकपा एमाले)
– जगत तिमिल्सिना (नेपाली कांग्रेस)

लुम्बिनी प्रदेश
– बासुदेव जंगली (नेपाली कांग्रेस)
– चन्द्रबहादुर केसी (नेपाली कांग्रेस)
– रामकुमारी झाक्री (नेकपा एमाले)

कर्णाली प्रदेश
– ललितजंग शाही (नेपाली कांग्रेस)
– मीनासिंह रखाल (नेकपा एमाले)

सुदूरपश्चिम प्रदेश
– लीलाकुमारी भण्डारी (नेकपा एमाले)
– खम्मबहादुर खाती (नेपाली कांग्रेस)