मनसुनको प्रभावः देशका विभिन्न भागमा वर्षाको सम्भावना

काठमाडौं । हाल मनसुनको न्यून चापीय रेखा सरदर स्थानको आसपास रहेकोले नेपालमा विभिन्न क्षेत्रहरूमा मौसममा परिवर्तन देखिएको छ । मौसम पूर्वानुमान महाशाखाका अनुसार, यस प्रणालीको प्रभाव विशेषगरी कोशी, मधेस र बागमती प्रदेशमा बढी देखिएको छ ।

उक्त प्रदेशहरूमा सामान्य बदलीका साथ धेरै स्थानहरूमा चट्याङसहित हल्कादेखि मध्यम वर्षा भइरहेको छ भने गण्डकी, लुम्बिनी र कर्णाली प्रदेशका एक–दुई स्थानमा पनि हल्का वर्षा भइरहेको जानकारी प्राप्त भएको छ ।

दिउँसो कोशी, मधेस, बागमती र गण्डकी प्रदेश तथा अन्य पहाडी भूभागमा सामान्य बदली रहने पूर्वानुमान छ । तराईका अन्य भागहरूमा आंशिक बदलीको सम्भावना रहेको छ । कोशी र बागमती प्रदेशका केही स्थानहरूमा मध्यम वर्षा हुने सम्भावना छ । मधेस र गण्डकी प्रदेशका थोरै स्थानहरूमा वर्षाको सम्भावना छ भने अन्य स्थानमा एक–दुई ठाउँमा मात्रै पानी पर्ने देखिएको छ ।

आज राति कोशी, मधेस, बागमती र गण्डकी प्रदेशमा सामान्य बदली रहनेछ । बाँकी भागहरूमा आंशिक बदली रहने अपेक्षा गरिएको छ । यी चारवटै प्रदेशका थोरै स्थानहरूमा र अन्य पहाडी भूभागका एक–दुई स्थानमा मध्यम वर्षा हुनसक्ने छ ।

देशभरि मनसुन सक्रिय रहेकाले बाढी, पहिरो जस्ता प्राकृतिक प्रकोपप्रति सतर्कता अपनाउन मौसम विज्ञहरूले अनुरोध गरेका छन् ।