निकोलस भुसाल गोरखाबाट पक्राउ, आजै काठमाडौं ल्याइँदै

काठमाडौं । निकोलस भुसाललाई काठमाडौं उपत्यका अपराध अनुसन्धान कार्यालयको टोलीले गोरखाबाट पक्राउ गरेको छ । उनलाई गोरखा नगरपालिका–८ स्थित सरस्वती आश्रम नजिकैबाट पक्राउ गरिएको प्रहरीले पुष्टि गरेको छ ।

उपत्यका अपराध अनुसन्धान कार्यालयका प्रवक्ता एसपी काजीप्रसाद आचार्यका अनुसार पक्राउ परेका भुसाललाई आवश्यक अनुसन्धानका लागि आजै काठमाडौं ल्याइने छ ।

भुसालमाथि सार्वजनिक शान्ति भड्काउने गतिविधिमा संलग्न भएको आरोप लगाइएको छ । प्रहरीले घटनाबारे थप विवरण सार्वजनिक गरेको छैन भने उनीमाथि प्रारम्भिक सोधपुछ प्रक्रिया अघि बढाइने जनाएको छ ।

भुसाल पछिल्ला दिनमा सामाजिक सञ्जालमा विवादास्पद अभिव्यक्ति दिँदै आएका थिए, जसपछि प्रहरीको निगरानीमा परेका थिए । पक्राउपछि अब उनको मुद्दा उपत्यका अपराध अनुसन्धान कार्यालयले हेर्ने बताइएको छ ।