नेपालका युवालाई लक्षित गरी चिनियाँ ‘युथ पायोनियर’ कार्यक्रम

काठमाडौं । नेपालस्थित चिनियाँ दूतावासले नेपाली युवालाई लक्षित गर्दै ‘चाइनिज एम्बेसी युथ पायोनियर प्रोग्राम (सिएनवाईपि)’ सञ्चालन गर्ने घोषणा गरेको छ । कार्यक्रममार्फत नेतृत्व विकास, सामाजिक–आर्थिक रूपान्तरणमा युवाको भूमिका विस्तार र चीन–नेपालबीचको सहकार्य सुदृढ गर्ने लक्ष्य राखिएको दूतावासले जनाएको छ ।

दूतावासका अनुसार कार्यक्रममा सहभागी हुने युवालाई नेतृत्व सम्बन्धी तालिम, नीति तथा सामाजिक मुद्दामा छलफल, कार्यशाला र अध्ययन भ्रमणमा सहभागी गराइनेछ । उत्कृष्ट सहभागीहरूलाई चीन भ्रमणको अवसरसमेत प्रदान गरिनेछ । साथै विभिन्न क्षेत्रका विज्ञ, कूटनीतिज्ञ र उद्यमीसँग अन्तरक्रिया गर्ने अवसर पनि कार्यक्रमको हिस्सा हुनेछ ।

यो कार्यक्रममार्फत ‘रूपान्तरणकारी सोच’ भएका युवाको सञ्जाल निर्माण गर्ने लक्ष्य लिइएको छ । छनोट भएका सहभागीहरू एक वर्षसम्म विभिन्न तालिम, गतिविधि र नेटवर्किङ कार्यक्रममा संलग्न रहनेछन् । कार्यक्रम सम्पन्न भएपछि उनीहरू ‘अल्मुनाइ’ सञ्जालमा आबद्ध भई निरन्तर सहकार्य र अवसर प्राप्त गर्न सक्नेछन् ।

आवेदन प्रक्रिया
कार्यक्रममा सहभागी हुन २२ देखि ३४ वर्ष उमेर समूहका नेपाली युवा पेशाकर्मी, सामाजिक अभियन्ता तथा विभिन्न क्षेत्रका व्यक्तिले आवेदन दिन सक्नेछन् । आवेदन फारम अंग्रेजीमा भरेर cnypnepal@163.com मार्फत पठाउनुपर्नेछ । आवेदन दिने अन्तिम मिति सन् २०२६ मे १७ ९२०८३ जेठ ३० तोकिएको छ ।

प्राप्त आवेदनमध्ये कार्यक्रमको उद्देश्यसँगको सान्दर्भिकताका आधारमा मूल्यांकन गरी १० देखि २० जना उम्मेदवार छनोट गरिने दूतावासले जनाएको छ ।

सफ्ट पावर प्रतिस्पर्धाको संकेत
विश्लेषकहरूका अनुसार चीन र अमेरिका जस्ता शक्ति राष्ट्रहरूले सञ्चालन गर्ने यस्ता युवा कार्यक्रमहरू केवल नेतृत्व विकासमा सीमित नभई ‘सफ्ट पावर कूटनीति’को महत्वपूर्ण माध्यम पनि हुन् ।

नेपालमा यस्ता कार्यक्रमहरूले युवालाई अन्तर्राष्ट्रिय अनुभव, नेटवर्क विस्तार र नीतिगत क्षमता विकासमा सहयोग पुर्‍याए पनि दीर्घकालीन कूटनीतिक प्रभावबारे बहस जारी छ । चीनको सिएनवाईपि जस्तै अमेरिकी नेतृत्व विकास कार्यक्रमहरू पनि सञ्चालनमा रहेकाले नेपालका युवाबीच पहुँच विस्तार गर्न दुवै देशबीच प्रतिस्पर्धा देखिएको छ ।