एनपीएलको दोस्रो संस्करण आजदेखि, उद्घाटन खेलमा जनकपुर–काठमाडौं भिड्दै

काठमाडौं । नेपाल क्रिकेट संघ (क्यान) को आयोजनामा हुने नेपाल प्रिमियर लिग (एनपीएल) को दोस्रो संस्करण आजदेखि सुरु हुँदैछ । क्यानले सार्वजनिक गरेको तालिका अनुसार उद्घाटन खेलमा डिफेन्डिङ च्याम्पियन जनकपुर बोल्ट्स र काठमाडौं गोर्खाज आमनेसामने हुनेछन् ।

उद्घाटन खेल कीर्तिपुरस्थित टियु मैदानमा दिउँसो ४ बजेबाट सुरु हुनेछ । यसपटक नवनिर्मित टियु क्रिकेट मैदानको फ्लडलाइट प्रायः सबै खेलको मुख्य आकर्षण बनेको छ, जसमा अधिकांश खेल रातमा आयोजना हुनेछ ।

यस संस्करणको प्रतियोगिता सिङ्गल राउन्ड रोबिन, इलिमिनेटर र क्वालिफायर चरण पार गर्दै मङ्सिर २७ गते उपाधि भिडन्तसँगै समापन हुनेछ । कुल ३२ खेल समेटिएको यो लिग गत वर्षका ८ फ्रेन्चाइजी टिमकै सहभागितामा हुँदैछ— जनकपुर बोल्ट्स, सुदूरपश्चिम रोयल्स, काठमाडौं गोर्खाज, चितवन राइनोज, विराटनगर किङ्स, लुम्बिनी लायन्स, पोखरा एभेन्जर्स र कर्णाली याक्स ।

टिम अक्सनमार्फत तैयार प्रत्येक टोलीले विश्वभरका स्टार क्रिकेटरहरू भित्र्याएर टिम बलियो बनाएका छन् । प्रतियोगितामा हरेक टिमले न्यूनतम चारदेखि अधिकतम छ जना विदेशी खेलाडी राख्न पाउने व्यवस्था छ । यसपटक फाफ डु प्लेसिस, जेसन रोय, वायने पार्नेल, इमरान ताहिर, क्रिस लिनजस्ता चर्चित विदेशी खेलाडीसमेत सहभागी हुँदैछन् । दोस्रो एनपीएलमा ४० भन्दा बढी विदेशी खेलाडी अनुबन्धित भइसकेका छन् ।

प्रख्यात प्रशिक्षकको उपस्थिति पनि यस संस्करणको अर्को आकर्षण बनेको छ । जनकपुरलाई गत वर्ष च्याम्पियन बनाएका पुबुदु दसनायके यसपटक विराटनगर किङ्ससँग छन् । जनकपुरले वेस्ट इन्डिजका दिग्गज ब्याट्सम्यान शिवनारायण चन्दरपललाई मुख्य प्रशिक्षक नियुक्त गरेको छ । काठमाडौं गोर्खाजले नेपालका पूर्वमुख्य प्रशिक्षक मोन्टी देसाईलाई जिम्मेवारी सुम्पेको छ । पोखरा एभेन्जर्सले भारतका राजीव कुमारलाई जिम्मेवारी दिएको छ भने लुम्बिनी लाइन्सले भारतीय मूलका टिनु योहान्नालाई ल्याएको छ ।

लिग चरणको अन्तिम खेल डिसेम्बर ७ मा कर्णाली याक्स र जनकपुर बोल्ट्सबीच हुनेछ । त्यसपछि डिसेम्बर ९ मा पहिलो क्वालिफायर, १० मा इलिमिनेटर, ११ मा दोस्रो क्वालिफायर खेलिनेछ । मङ्सिर २७ (डिसेम्बर १३) शनिबार ग्रान्ड फिनाले हुनेछ ।