जेनजी आन्दोलनका मृतकको सम्मानमा बुधबार सार्वजनिक बिदा

काठमाडौं । सरकारले जेनजी आन्दोलनका क्रममा ज्यान गुमाउनेहरूको सम्मानस्वरूप यही असोज १ गते (बुधबार) नेपालभर सार्वजनिक बिदा दिने निर्णय गरेको छ ।

गृह मन्त्रालयले मंगलबार सार्वजनिक गरेको सूचनाअनुसार, भदौ २३ र २४ गतेको प्रदर्शनमा ज्यान गुमाउने मृतकप्रति श्रद्धाञ्जलीस्वरूप सार्वजनिक बिदा दिने र राष्ट्रिय झण्डा आधा झुकाउने निर्णय भएको हो ।

यसअघि सोमबार बसेको मन्त्रिपरिषद् बैठकले शोक दिवसका रूपमा मनाउने निर्णय गर्दै नेपालका सबै सरकारी कार्यालय, विदेशस्थित दूतावास र नियोगहरूमा समेत झण्डा आधा झुकाइने जनाएको थियो ।

सूचनामा भनिएको छ, “मिति २०८२ भाद्र २३ र २४ गते जेन-जी पुस्ताद्वारा भएको प्रदर्शनका क्रममा ज्यान गुमाउने मृतकहरूको सम्मान स्वरूप राष्ट्रिय शोक मनाउन मिति २०८२।०६।०१ गते बुधबार नेपालभरका सरकारी कार्यालय, विदेशस्थित नेपाली दूतावास र नियोगहरूमा सार्वजनिक बिदा दिने र राष्ट्रिय झण्डा आधा झुकाउने नेपाल सरकार (मन्त्रिपरिषद्) बाट मिति २०८२/०५/३० गते निर्णय भएको व्यहोरा सबैको जानकारीको लागि यो सूचना प्रकाशित गरिएको छ ।”