भिजिट भिसा छानबिन मागमा रास्वपा–राप्रपाको संसद बहिष्कार जारी

काठमाडौं । भिजिट भिसा प्रकरणको छानबिनका माग पुरा नभएको भन्दै राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)ले बुधबार पनि प्रतिनिधिसभाको बैठक बहिष्कार गरे ।

बैठक सुरु भएको केही क्षणमै दुवै दलका सांसदहरू उभिएर विरोध जनाए । सभामुख देवराज घिमिरेले रास्वपाका अशोककुमार चौधरीलाई बोल्न अनुमति दिएपछि चौधरीले सरकार समितिको गठनमा गम्भीर नभएको आरोप लगाउँदै माग पूरा नभएसम्म विरोध जारी रहने बताए । त्यसपछि राप्रपाका सांसद दिपकबहादुर सिंहले पनि समान धारणा राखे ।

भिजिट भिसा प्रकरणमा संसदीय छानबिन समिति वा उच्चस्तरीय न्यायिक समिति गठन गर्नुपर्ने मागमा अडान लिएका यी दलहरू गत जेठ १३ देखि निरन्तर रूपमा संसद बहिष्कार गर्दै आएका छन् । सांसद सिंहको सम्बोधनपछि दुवै दलका सांसदहरू बैठक कक्षबाट बाहिरिएका थिए ।