काठमाडौंमा खुला ठाउँमा प्लास्टिक जलाउन पूर्ण प्रतिबन्ध

काठमाडौं । काठमाडौं महानगरपालिकाले खुला ठाउँमा प्लास्टिक तथा प्लास्टिकजन्य वस्तु जलाउन पूर्णरूपमा प्रतिबन्ध लगाएको छ । वातावरण व्यवस्थापन विभागले यस निर्णयको जानकारी दिँदै चिसो मौसममा बढ्ने फोहोर र प्लास्टिक जलाउने क्रियाकलापले वायु प्रदूषण बढाउने भन्दै यस्तो कदम उठाइएको जनाएको छ ।

महानगरका अनुसार जाडो महिनामा काठमाडौं उपत्यकामा वायु प्रदूषणको स्तर धेरै हदसम्म बढ्छ । विभाग प्रमुख सरिता राईले भनिन्, “खुला ठाउँमा प्लास्टिक र फोहोर जलाउने कार्यले वायु प्रदूषणमा ठूलो योगदान पुर्याउँछ । जनस्वास्थ्य र वातावरणको सुरक्षाका लागि यो निर्णय आवश्यक रहेको हो ।”

वायु प्रदूषणका कारण बालबालिका, ज्येष्ठ नागरिक, दम र खोकीजस्ता श्वासप्रश्वासका बिरामी, मुटु रोगी तथा दीर्घरोगबाट पीडित व्यक्तिहरू बढी प्रभावित हुन्छन् । महानगरले भनेको छ कि यी जोखिमका समूहसँगै सम्पूर्ण शहरबासीको स्वास्थ्य जोगाउन खुलेर वस्तु नजलाउने कार्य अत्यावश्यक छ ।

महानगरपालिकाले उल्लंघन हुनेहरूलाई कडा कारबाही हुने चेतावनी दिएको छ । राईका अनुसार, काठमाडौं महानगरपालिका वातावरण तथा प्राकृतिक स्रोत संरक्षण ऐन २०७७ र आर्थिक ऐन २०८२ अनुसार प्रतिपटक १० हजार रुपैयाँ जरिवाना गरिनेछ ।

महानगरले सबै नागरिकसँग अनुरोध गरेको छ कि घर–आसपासको फोहोर, प्लास्टिक र अन्य जलाउन योग्य वस्तुहरू सुरक्षित तरिकाले व्यवस्थापन गरुन् र वातावरणीय क्षति कम गर्न पहल गरुन् ।