बालेन शाहको प्रस्तावः संसद् विघटन गरी अन्तरिम सरकार गठन गर्न राष्ट्रपतिलाई आग्रह

काठमाडौं । काठमाडौं महानगरपालिकाका मेयर बालेन्द्र शाह (बालेन) ले राष्ट्रपति रामचन्द्र पौडेलसमक्ष संसद् विघटन र अन्तरिम सरकार गठनको औपचारिक प्रस्ताव गरेका छन् ।

बुधबार साँझ सामाजिक सञ्जालमार्फत सार्वजनिक अभिव्यक्ति दिँदै बालेनले देश अहिले ‘इतिहासमै नभएको फरक परिस्थितिमा’ पुगेको भन्दै यस्तो कदम आवश्यक भएको बताएका हुन् ।

Gen Z क्रान्तिलाई संरक्षण गर्न संसद् विघटनको माग
बालेनले आफ्नो पोस्टमा देशका युवाहरू, विशेषतः Gen Z पुस्ताले सुरु गरेको आन्दोलन ऐतिहासिक क्रान्तिको रूपमा उदाएको उल्लेख गर्दै यसलाई संरक्षित गर्न तत्काल अन्तरिम सरकार आवश्यक रहेको बताएका छन् ।

उनले लेखेका छन्, “अब देश अन्तरिम सरकारमा जाँदैछ, जसले देशमा नयाँ चुनाव गराउनेछ । यो अन्तरिम सरकारको काम भनेको चुनाव गराउने र देशलाई नयाँ जनादेश दिने हो ।”

सुशीला कार्कीलाई नेतृत्वमा समर्थन
बालेनले पूर्व प्रधानन्यायाधीश सुशीला कार्कीलाई सम्भावित अन्तरिम सरकार प्रमुखको रूपमा अघि सारिएको प्रस्तावप्रति पनि समर्थन जनाएका छन् । “तपाईँहरूबाट आएको प्रस्ताव पूर्व प्रधानन्यायाधीश श्रीमान् सुशीला कार्कीप्रति पूर्ण समर्थन छ,” उनले भनेका छन् ।

युवाहरूलाई धैर्य र चुनावमा नेतृत्व लिन सुझाव
सन्देशमा बालेनले तत्काल नेतृत्वमा आउने होड नगर्न आग्रह गर्दै युवाहरूलाई संयम अपनाउन र भविष्यका लागि आफूलाई तयार राख्न पनि सुझाव दिएका छन् ।

अन्त्यमा उनले राष्ट्रपति समक्ष यो ऐतिहासिक आन्दोलनलाई संस्थागत गर्न र मुलुकलाई नयाँ दिशातर्फ लैजान संसद् विघटन र अन्तरिम सरकार गठनको ‘अविलम्ब’ निर्णय लिन अपिल गरेका छन् ।