देवानगञ्ज घटनाको छानबिन गर्न समिति घटनास्थलमा, स्थानीयसँग बयान संकलन

विराटनगर । सुनसरीको देवानगञ्ज गाउँपालिका–३ कप्तानगञ्जमा भएको गोलीकाण्डको सत्यतथ्य पत्ता लगाउन सरकारले गठन गरेको छानबिन समिति बुधबार घटनास्थल पुगेको छ । टोलीले घटनास्थलको निरीक्षण गर्नुका साथै स्थानीय बासिन्दासँग घटनाबारे जानकारी संकलन गरेको छ ।

आइतबार राति दुई समूहबीच भएको झडप नियन्त्रण गर्ने क्रममा प्रहरीले चलाएको गोली लागेर एक जनाको मृत्यु भएको थियो भने अन्य नौ जना घाइते भएका थिए । घटनापछि क्षेत्र तनावग्रस्त बनेको थियो ।

घटनाको विरोधमा प्रदर्शन उग्र बनेपछि गृह मन्त्रालयले सोमबार सहसचिव भुपेन्द्र थापाको संयोजकत्वमा पाँच सदस्यीय छानबिन समिति गठन गरेको थियो ।

समिति सोमबार नै विराटनगर पुगेको थियो । त्यही दिन टोलीले उपचाररत घाइतेहरूलाई भेटेर उनीहरूको बयान लिएको थियो । बुधबार भने टोली प्रत्यक्ष रूपमा घटनास्थल पुगेर घटनाको अवस्थाबारे अध्ययन गर्नुका साथै स्थानीयसँग छलफल र सोधपुछ गरेको हो ।

समितिले संकलन गरेका विवरण र प्रमाणका आधारमा घटनाबारे प्रतिवेदन तयार गरी गृह मन्त्रालयमा बुझाउने जनाइएको छ ।