एशिया कप राइजिङ स्टार्स क्रिकेटमा भारतलाई हराउँदै पाकिस्तान सेमिफाइनलमा

काठमाडौं । एशिया कप राइजिङ स्टार्स क्रिकेटमा पाकिस्तान ‘ए’ले उत्कृष्ट प्रदर्शन गर्दै भारत ‘ए’लाई आठ विकेटले पराजित गर्दै एक खेल अगावै सेमिफाइनल यात्रा सुनिश्चित गरेको छ । आइतबार राति सम्पन्न यस रोमाञ्चक खेलमा पाकिस्तानले बलिङ र ब्याटिङ दुवै विभागमा स्पष्ट रूपमा नियन्त्रण जमायो ।

पहिले ब्याटिङ गरेको भारत ‘ए’ १९ ओभरमै अलआउट हुँदै १३६ रनमै समेटियो । ओपनर वैभव सूर्यवंशीले ४५ रन र नमन धिरले ३५ रन जोडे । हर्ष दुवेको १९ रनबाहेक भारतका अन्य खेलाडी ठूला योगदान गर्न असफल रहे ।

पाकिस्तानका शाहिद अजिजले उत्कृष्ट बलिङ गर्दै तीन विकेट झारे भने साद मसुद र माज सदाकतले दुई–दुई विकेट हात पारे ।

लक्ष्य पछ्याउन मैदानमा उत्रेको पाकिस्तान ‘ए’ले खेललाई सहज बनाउँदै १३ ओभर २ बलमै लक्ष्य पार गर्‍यो । पारीका नायक बने—माज सदाकत । उनले ४७ बलमा चार छक्का र सात चौका प्रहार गर्दै ७९ रन जोडे । बलिङ र ब्याटिङमा चम्किएको उनको अलराउन्ड प्रदर्शन पाकिस्तानको जितको मुख्य कारण बन्यो ।

यो जितसँगै समूह ‘बी’को शीर्ष स्थानमा रहेको पाकिस्तान ‘ए’ले चार अंक जोड्दै सेमिफाइनलमा प्रवेश गरिसकेको छ । भारत ‘ए’ दुई अंकका साथ दोस्रो स्थानमा रहेकामा ओमानले पनि समान दुई अंक जोडेको छ । समूह ‘बी’मा भारत, पाकिस्तान, यूएई र ओमान छन् ।

उता समूह ‘ए’मा बंगलादेश र अफगानिस्तानले दुईदुई अंक जोड्दै अग्रस्थानमा छन् भने हङकङ र श्रीलंका अझै अंकविहीन रहेका छन् ।