एमबाप्पे–डेम्बेले चम्किएपछि फ्रान्स लगातार तेस्रो विश्वकप सेमिफाइनलमा

काठमाडौं । फिफा विश्वकप २०२६ अन्तर्गत शुक्रबार बिहान सम्पन्न क्वार्टरफाइनलमा फ्रान्सले मोरक्कोलाई २–० ले पराजित गर्दै अन्तिम चारमा स्थान सुरक्षित गरेको छ । अमेरिकाको बोस्टन स्टेडियममा भएको प्रतिस्पर्धामा कप्तान किलियन एमबाप्पे र उसमान डेम्बेलेले दोस्रो हाफमा गोल गर्दै फ्रान्सलाई सहज जित दिलाए ।

पहिलो हाफ गोलरहित बराबरीमा सकिए पनि खेलको २८औँ मिनेटमा एमबाप्पेले पाएको पेनाल्टी अवसरलाई मोरक्कोका गोलरक्षक यासिन बोनोउले उत्कृष्ट बचाउ गर्दै फ्रान्सलाई अग्रता लिनबाट रोकेका थिए । २५औँ मिनेटमा एमबाप्पेमाथि नुस्साएर गरिएको फाउलपछि फ्रान्सले पेनाल्टी पाएको थियो ।

दोस्रो हाफमा फ्रान्सले खेलमा दबाब बढायो । ६०औँ मिनेटमा डिजायर डुएको सुन्दर पासलाई सदुपयोग गर्दै एमबाप्पेले गोल गरेपछि फ्रान्सले अग्रता लिएको थियो । त्यसको केवल छ मिनेटपछि उसमान डेम्बेलेले अर्को गोल थप्दै टोलीको जित सुनिश्चित गरे ।

यस जितसँगै फ्रान्स लगातार तेस्रो संस्करणको विश्वकपमा सेमिफाइनल पुग्न सफल भएको छ । साथै, मोरक्कोको अन्तर्राष्ट्रिय फुटबलमा जारी ३४ खेलको अपराजित यात्रासमेत यही खेलसँगै समाप्त भएको छ ।

सन् २०१८ को विश्व विजेता तथा २०२२ को उपविजेता फ्रान्स अब फाइनल प्रवेशका लागि स्पेन र बेल्जियमबीच हुने क्वार्टरफाइनलको विजेतासँग भिड्नेछ । फ्रान्सले लगातार उत्कृष्ट प्रदर्शन गर्दै पुनः विश्वकप उपाधि दाबेदारका रूपमा आफूलाई बलियो रूपमा प्रस्तुत गरेको छ ।